Հաջողության պատմությունների մասին շատ է խոսվում, իսկ հաջողության հասնելու ճանապարհը, հանդիպած դժվարությունները, ձախողումները հաճախ մնում են մութ անկյունում։ Staff.am-ի նախաձեռնությամբ իրականություն դարձած Beyond Podcast-ը ստեղծված է լուսաբանելու այն ամենն, ինչ ընկած է հաջողության հասած մարդու մասնագիտությունից, պաշտոնից և կոչումից այն կողմ։ Ուշադրության կենտրոնում լինելու է հենց մարդը՝ իր անհատականությամբ, գաղափարներով և ասելիքով։
Կիսվել, կրթել և ոգեշնչել․ սա է փոդքասթի առաքելությունը։ Նախագծի շրջանակներում հյուրընկալելու ենք մեր հասարակությունում փոփոխություն գեներացնողներին, մարդկանց, որոնք իրենց ոլորտում գրանցել են կարևոր, հետաքրքիր և աննախադեպ ձեռքբերումներ, և խոսքն ամենևին էլ զբաղեցրած պաշտոնների մասին չէ։ Կարևոր չէ՝ ծրագրավորող ես թե բժիշկ, կառավարիչ թե նկարիչ, եթե ունես նորը բացահայտելու, սովորելու և ինքնազարգացման անհագ ծարավ, եթե ցանկանում ես որսալ նոր մտքեր ու գաղափարներ, եթե փնտրում ես մոտիվացիա և իմաստ, ապա փոդքասթը հենց քեզ համար է։
Այսուհետ, ամեն շաբաթ թողարկվող մեր փոդքասթի յուրաքանչյուր էպիզոդը կամփոփենք համառոտ հոդվածով՝ ներառելով ամենակարևոր մտքերը։ Գնացինք։
Մեր հյուրի մասին
Beyond Podcast-ի առաջին էպիզոդի հյուրն է դոկտոր Մադլեն Մինասյանը։ Մադլենի հետ զրուցել ենք իր մանկության հիշողությունների, մասնագիտական ուղու,Picsart-ում և AUA-ում իր ծավալած գործունեության, CliftonStrengths-ի, քոուչինգի, ծնողավարության և արհեստական բանականության մասին։
Մանկության տարիները որոշիչ դեր են խաղում մեր ապագա «ես»-ի ձևավորման գործում։ Մադլենը ժպիտով է հիշում կյանքի այդ շրջանը։ Նա մեծացել է ուսուցչի ընտանիքում և մանկուց սիրահարվել այդ աշխատանքին։ Ոգեշնչված մայրիկի ծավալած գործունեությունից՝ Մադլենը երազում էր, որ երբ մեծանա, ունենա ոչ թե աշխատանք, այլ առաքելություն․ այդպես էլ եղավ։ Նա իրեն գտավ դասավանդման, քոուչինգի և մենթորության աշխարհում։
Մադլենը առանձնահատուկ կարևորություն է տալիս անհատի ուժեղ կողմերը վերլուծող Clifton Strengths գործիքին։ Սա ինքնաճանաչման և անձնային աճ գրանցելու ուղեցույց է։ Clifton Strengths-ի հիմքում այն գաղափարախոսությունն է, որ հաջողության հասնելու ճանապարհին առավել նպատակահարմար է կենտրոնանալ մեր ուժեղ, այլ ոչ թե թույլ կողմերի վրա։ Մենք բոլորս աստղեր ենք՝ մեզ հատուկ կարողություններով և խառնվածքով։ Խնդիրն այն է, որ մեզ փորձում են ստանդարտացնել, դարձնել միանման, և արդյունքում մենք սկսում ենք աստիճանաբար խամրել։ Փոխարենը պետք է տոնենք մեր տարբերությունները և է՛լ ավելի ընդգծենք մեր յուրօրինակությունը։
Հատուկ ձեզ համար առանձնացրել ենք օգտակար հղումներ, որոնք կօգնեն բացահայտել քո ուժեղ կողմերը։
Myers-Briggs Type Indicator (MBTI)
Մեր գործընկերոջ մասին
Մեր երախտագիտությունն ենք հայտնում Սինոփսիս Արմենիա-ին՝ փոդքասթի առաջին իսկ էպիզոդից մեր կողքին լինելու և աջակցելու համար։ Նշենք, որ Սինոփսիս ընկերությունն աշխարհում ունի 20,000 աշխատակից, որոնցից 1200-ն աշխատում են Երևանում և Գյումրիում։ Այս տարի Սինոփսիսը նշում է իր գործունեության 20-ամյակը Հայաստանում։ Ուշագրավ է, որ ամենանորարար չիպերի 90%-ից ավելին օգտագործում է Սինոփսիսի տեխնոլոգիաները։
Դե ինչ, էպիզոդը ամբողջությամբ բացահայտելու և օգտակար դասեր քաղելու համար ուղղակի առաջարկում ենք դիտել այն։ Չմոռանա՛ք բաժանորդագրվել մեր յութուբյան ալիքին՝ գալիք էպիզոդները բաց չթողնելու համար։
