Գնալ հարցազրույցի, ինչպես`ժամադրության

Կոկիկ արդուկած պիջակ, ուղղված վարսեր, դասական կոշիկներ, սնգույր, շրթներկ ու հայելու դիմաց փորձնական դիմախաղեր:
Ժամադրությա՞ն եք շտապում: Կարծես թե այո, միայն մի փոքր տարբերությամբ: Այդ ժամադրության անունն այս անգամ աշխատանքի հարցազրույց է, իսկ հանդիպման վայրը ոչ թե ռեստորանն է, այլ աշխատանքային գրասենյակը:

Այո՛, ճիշտ հասկացաք: Հարցազրույցին պետք է և ճի՛շտ է ներկայանալ այնպես, ինչպես կգնայիք Ձեր սիրելիի հետ առաջին անգամ ժամադրության: 

Արտաքինից սկսած մինչև բովանդակության ճիշտ ներկայացում: Ժամադրության, ինչպես և հարցազրույցի հիմնական նպատակը պատշաճ տպավորություն թողնելն է:

-Կարևորը հոգին գեղեցիկ լինի,-ասում է տղամարդն ու նայում կնոջ արտաքինին:
-Կարևորը «սոֆթ» հմտություններն են,-երբեմն ասում են գործատուներն ու առաջին հերթին դիտարկում մասնագիտական փորձը:
Երկուսի դեպքում դիտարկվում եք Դուք՝ հումորի զգացումից, հաղորդակցման հմտությունից մինչև մասնագիտական կարողություններ:

Առաջին անգամ ժամադրվելիս կարևորվում են արտաքին տվյալները, հետո միայն անձնական որակները:
Դե, մեծամասնությամբ այդպես է, խոստովանե՛ք:
Երկրորդի դեպքում՝ այսպես կոչված «հարդ», ապա միայն «սոֆթ» հմտությունները: 

Երկուսի դեպքում էլ ստանում եք զանգ:
«Հանդիպե՞նք»,-կասեր Ձեր սիրելին մեղմ ու քնքուշ ձայնով:
«Դուք հրավիրված եք հարցազրույցի»,-քաղաքավարի և պաշտոնական տոնով Ձեզ կդիմեր պոտենցիալ գործատուն:

Նախքան ժամադրության հրավիրելը ժամանակակից Կուպիդոնն ուսումնասիրում է Ձեր սոցիալական էջերը, գործատուն՝ staff.am-ում գրանցած Ձեր մասնագիտական պրոֆիլը կամ ուղարկած ինքնակենսագրականը:

Առաջին հայացքից կարծես թե տարբեր իրավիճակներ են, սակայն երկուսի դեպքում էլ կա նույն ընթացքը: Երկու տարբեր հանդիպումների ընթացքում հնչող հարցերին ու պատասխաններին հաջորդում է երկու սցենար. կա՛մ հրաժեշտ, կա՛մ հարաբերությունների զարգացում: 

Հարց է առաջանում. ինչպե՞ս ընթացք տալ հարցազրույցին, որն այնքա՜ն նման է ժամադրությանը:

Հարցազրույցին կամ ժամադրությանը շտապելուց առաջ՝ շունչ քաշեք

Ժամադրության կամ մասնագիտական հարցազրույցին նախապատրաստվելը սովորաբար սթրեսային է, որը, սակայն, հաղթահարելի է: 

Նախ գիտակցենք, ճանաչենք մեր վախերը հանդիպմանը նախապատրաստվելիս: Ունենք վախեր անհայտ անձի հետ շփումից, մերժվելուց, հասկացված չլինելուց ու անցանկալի սցենարների հետ բախվելուց, այնպես չէ՞:

Ժամադրության վերաբերյալ հոգեբանների դիտարկումները կարելի է նույնականացնել նաև հարցազրույցներին նախապատրաստվելու հոգեվիճակներին:
ԱՄՆ-ի «Հոգեբանական աճի կենտրոն» կազմակերպության հոգեբանները խորհուրդ են տալիս․ 

1․ Լինել ներկայում

Լինել ներկայում նշանակում է չկենտրոնանալ անորոշ ապագայի վրա, այլ կենտրոնանալ այս պահի և վայրկյանի վրա: Ժամադրությունից (մենք կավելացնեինք՝ նաև հարցազրույցից) առաջ ցանկալի է չկառչել հեռախոսից՝ հնարավորություն տալով Ձեզ ազատության մեջ լինել, մտորել ու ինքներդ Ձեր նկատմամբ ազնիվ լինել, որը հնարավոր է միայն առանց կպչուն մտքերի:

Մեկ այլ հոգեբան, որն առավել հայտնի է ԱՊՀ և հարակից երկրների տարածքում` Միխայիլ Լաբկովսկին, խորհուրդ է տալիս անկեղծ լինել նախևառաջ ինքներդ ձե՛զ հետ.

Բոլորը հորդորում են լինել բնական, սակայն դեռևս չեմ հանդիպել մարդկանց, որոնք անկեղծորեն ցուցադրում են իրենց իրական ով լինելը: Պատկերացրեք ժամադրության ընթացքում դիմացինին ասեք, որ ունեք որևէ վատ սովորություն. պարզ է չէ՞, թե ինչ ընթացք կլինի։
Մանկության տարիներին շատերը ծնողների կողմից արժանանում են հակազդեցության, երբ առավելությունների կողքին ցուցադրում են իրենց թուլությունները։ Սրա հետևանքով մարդու մոտ ձևավորվում է պատկերացում, որ եթե առաջին հանդիպման ժամանակ ներկայանա այնպիսին, ինչպիսին կա՝ ոչ միայն իր առավելություններով, այլև թերություններով, նրա հետ գործ ունենալ ուղղակի չեն ցանկանա:
Մեր գերնպատակը չպետք է լինի դիմացինին դուր գալը, այլ ինքներս մեզ է՛լ ավելի ընդունելն ու ճանաչելն այնպիսին, ինչպիսին կանք։ Միայն այդ ընկալումներով հաճույք կստանանք յուրաքանչյուր հանդիպումից․ մեզ պարտավոր չեն բոլորն ընդունել:

Հոգեբանի խորհուրդն, իհարկե, վերաբերում է անձնական հարաբերություններին, բայց համաձա՞յն եք, որ նույն մոտեցումը պետք է ունենալ նաև աշխատանքի հարցազրույցին մասնակցելիս:

Բացահայտ ճշմարտություն է. անձնական ու մասնագիտական հաջողության հիմքում առաջին հերթին ինքդ քեզ հետ ներդաշնակ լինելն է:

Այժմ սիրո տոներն են: Քաղաքը զարդարված է կարմիր սրտաձև փուչիկներով, սրճարանները լի են ժամադրության հրավիրված զույգերով: Ոմանք էլ ժամադրության փոխարեն շտապում են հարցազրույցների: 
Դե ինչ, երկուսի դեպքում էլ մաղթում ենք, որ բարեհաջող ընթացք լինի: 

Իսկ թե ինչպես պրակտիկ ծանոթանալ հարցազրույցին պատրաստվելու նրբություններին, ավելի գրագետ ու վստահ անցնել աշխատանքի դիմելու բոլոր փուլերով՝ ինքնակենսագրական, ուղեկցող նամակ, հարցազրույց, առաջարկում ենք ծանոթանալ staff.am էկոհամակարգի կրթական ուղղվածությանը՝ Career Factory: Այստեղ գործնականում արդեն իսկ ձեռք եք բերում հմտություններ, որոնք կօգնեն հանդիպումներին գնալ պատրաստված ու ժպիտով։