Անվտանգություն, կարգապահություն, քաղաքացիական պատասխանատվություն՝ այս արժեքներն իրենց կարևորությունը երբեք չեն կորցնում, սակայն հատկապես ընդգծվում են մեր ժամանակներում, երբ աշխարհը փոփոխվում է արագ, իսկ մարտահրավերներն այլևս միայն տեսական չեն։ Հենց այս իրողությունների խորքային գիտակցումն էլ հիմք հանդիսացավ «Ազատազէն» կրթական ՀԿ-ի ստեղծմանը։
«Ազատազէն» կրթական ՀԿ-ն հիմնադրվել է 2021 թվականին 44-օրյա պատերազմի մասնակիցների կողմից՝ նպատակ ունենալով վերաիմաստավորել և զարգացնել զենքի մշակույթը Հայաստանում: Կազմակերպության գործունեությունը նպատակաուղղված է Հայաստանում զենքի կարգապահ մշակույթի ձևավորմանն ու զարգացմանը, օրենսդրական դաշտի բարելավումներին, զինագործության զարգացման նպաստմանը, ինչպես նաև հրաձգության համար համապատասխան ենթակառուցվածքների զարգացմանը, ռազմասպորտային և հրաձգության մրցույթների կազմակերպմանը։
Վերոնշյալ ուղղություններով կազմակերպության գործունեության և ռազմավարական նպատակներին հասնելու համար անհրաժեշտ էին հրաձգարաններ, և Երևանի հրաձգարանը դարձավ տվյալ խնդրի լուծումը։
Հրաձգարանը շատ արագ դարձավ ոչ միայն նախաձեռնության անդամների, այլև նրանց ընտանիքի անդամների, ընկերների և գործընկերների սիրելի վայրը։ Եվ կարճ ժամանակահատվածում առաջացավ հստակ պահանջ և ցանկություն այդ փորձառությունը կրկնելու և իրենց ընկերների հետ կիսելու։ Հենց այս ամենն էլ հիմք հանդիսացավ զենքի անվտանգ գործածության ուսուցողական բովանդակությունը և հրաձգությունը հանրության ավելի լայն շրջանակների հասցնելու համար առավել հստակ ու կոնկրետ քայլերի անցնելու համար։
Այս նպատակով Ազատազէնը մեկնարկեց և զարգացրեց թիմային միջոցառումների բազմաթիվ տարբերակներ տարբեր նախասիրություններ ունեցողների համար՝ սկսնակներից մինչ սպորտային հրաձգության սիրահարներ։ Հրաձգությունը կարող է կազմակերպվել մրցութային կամ ոչ մրցութային ձևաչափով։ Բոլոր միջոցառումները՝ անկախ հրաձգության բարդության մակարդակից, ներառում են զենքից օգտվելու անվտանգության կանոնները։ Միջոցառումներում ներառվում են առաջին օգնության տեսական և գործնական դասեր ևս՝ ըստ թիմի նախընտրության։
Թիմային այս միջոցառումները նախագծելիս Ազատազէնը հստակ նպատակ ուներ․ կազմակերպել ոչ միայն ժամանացային, այլ հստակ արժեքային և նպատակային միջոցառումներ։ Միջոցառումների առանձնահատկությունն այն է, որ մասնակիցները հայտնվում են սթրեսային, ադրենալինով լի իրավիճակներում, որոնք պահանջում են արագ մտածելու, թիմակիցներին վստահելու և համագործակցելու կարողություններ: Ճշգրտություն, կենտրոնացում և թիմային որոշումների կայացում՝ սրանք հրաձգության դաշտում էական են ամեն վայրկյան: Իսկ փորձառությունն ուղղակիորեն տեղափոխվում է գրասենյակային միջավայր՝ ուժեղացնելով թիմային կապերը և վստահությունը:
Այս նորարարական մոտեցման հիմքում ընկած է այն գաղափարը, որ թիմային աշխատանքը պետք է չափվի հստակ գործողություններով:
Մասնակիցները ներգրավվում են սիմուլյացիոն մարտավարական առաջադրանքներում, որտեղ սովորում են գործել որպես մեկ միավոր։ Փորձառու հրահանգիչներն ապահովում են յուրաքանչյուր մասնակցի ներգրավվածությունը՝ անկախ նախնական հմտություններից՝ դարձնելով այս փորձառությունը թե՛ համախմբող, թե՛ անհատական զարգացման հնարավորություն։
Այսպիսի յուրահատուկ մոտեցումը նոր շունչ է բերել թիմային միջոցառումների կազմակերպման մեջ՝ միաժամանակ համադրելով հաճելի փորձառությունն ու իրական փոփոխությունը։ Ազատազէնի թիմային ծրագրերին մասնակցել են մի շարք առաջատար կազմակերպություններ՝ ՏՏ ոլորտի ընկերություններից (Picsart, Digitain, SoftConstruct) մինչև կրթական հաստատություններ («Այբ» դպրոց, «Շիրակացու ճեմարան» ԳՀ, «Սեբաստացի» կրթահամալիր) և միջազգային կազմակերպություններ (ArevMedia, JetBrains, Amungo Navigation): Նրանցից ամենահաճախ փոխանցվող արձագանքն է, որ հրաձգարանից դուրս են գալիս ոչ միայն ոգեշնչված, այլև իրական թիմ դարձած։
staff.am-ի թիմը ևս վերջերս մասնակցեց Ազատազէնի թիմային միջոցառմանը, որն իսկապես տարբերվող և բացառիկ փորձառություն էր։
Ժամանակակից կազմակերպությունները զարգանում են արագ, բայց այս արագությունը պահանջում է վստահություն, ճկունություն և հստակ հաղորդակցություն: Ազատազէնի թիմային վարժանքները ստեղծում են ճնշման ներքո համագործակցության տարածք, որտեղ բացահայտվում են թիմի ուժեղ կողմերը և զարգանում են նոր հմտություններ: Սա նաև ուժեղ ուղերձ է աշխատակիցներին՝ «մենք ներդրում ենք կատարում քո անձնական աճի մեջ»:
Ազատազէնի թիմային միջոցառումներն այն կազմակերպությունների համար են, որոնք փնտրում են ոչ թե հերթական թիմբիլդինգ, այլ փորձառություն, որը կդառնա շրջադարձային իրենց թիմի համար:
Ազատազէնի ծրագրերը ցույց են տալիս, որ թիմային ոգին զարգացնելու համար կարելի է գտնել նորարարական լուծումներ: Այս մոտեցումը հնարավորություն է տալիս կազմակերպություններին ստեղծել ավելի միավորված, վստահող և կայուն թիմեր՝ պատրաստ առերեսվելու ժամանակակից գործարար միջավայրի մարտահրավերներին:
Ազատազէնի գործունեությանն ու թիմային միջոցառումների ծրագրերին կարող եք ծանոթանալ հետևյալ հղումով՝
