staff.am-ը շարունակում է «Հայաստանի լավագույն գրասենյակները» նախագիծը, որի նպատակն է ֆոտոպատմությունների տեսքով ներկայացնել Հայաստանում գործող ընկերությունների ամենատարբերվող, գեղեցիկ, հարմար, ոճային և տրամադրող գրասենյակները:
Նախագծի շրջանակում մենք այցելել ենք ՀայՓոստի գլխամասային գրասենյակ, որը գտնվում է Սարյան փողոցի վրա և էապես տարբերվում է ՀայՓոստի բաժանմունքներից։
Երբ խոսում ենք ՀայՓոստի մասին, առաջինն աչքի առաջ են գալիս բոլորիս դեռ մանկուց ծանոթ բաժանմունքները, որտեղ կոմունալ վճարներն ենք անում և ստանում բաղձալի նամակները կամ ծանրոցները։
Բայց Սարյանի «պոչտայի շենքի» 9-րդ հարկում գտնվում է այդ կառույցի «սիրտը», որտեղ աշխատում են ՀայՓոստի մարքեթինգի և ՏՏ թիմերի տասնյակ մասնագետներ: Իսկ միջավայրը շատ է տարբերվում բաժանմունքներից։
Գրասենյակը վերանորոգվել և նոր տեսք է ստացել մոտ մեկ տարի առաջ։ Մինչ այդ այն ևս չէր տարբերվում շենքի մյուս հարկերում գործող գրասենյակներից։
Բարեփոխումը պայմանավորված է նախ և առաջ ՀայՓոստի թիմում կառուցվածքային փոփոխություններով, որոնց հետևանքով արդեն նորացված կառույցն այսուհետ ունի իր մարքեթինգի, անալիտիկայի, պրոդուկտի, developer-ների և այլ ստորաբաժանումներ։
Նոր թիմերի համար ընտրվել է ավելի ժամանակակից կոնցեպտով գրասենյակ՝ open space ձևաչափով՝ բաղկացած 2 միանման հատվածից, որտեղ 60-ից ավելի աշխատակից է տեղավորվում։
Open space-երից մեկում ՏՏ թիմն է, մյուսում՝ պրոդուկտի, անալիտիկայի և մարքեթինգի թիմերը։ Այդ ձևաչափի մասին թիմակիցները տարբեր կարծիքներ հնչեցրին՝ open space-ում աշխատելը սիրելուց մինչև դժվարությամբ հարմարվելը։
Պրոդուկտների կառավարման և զարգացման բաժնի ղեկավար Գրիգոր Բաղդագուլյանի խոսքով՝ open space-ը շահերի բախման հարթակ է, բայց միաժամանակ լավ հնարավորություն է թիմի համար արագ հաղորդակցվելու և աշխատանքային հարցերն արագ լուծելու։
Աշխատանքային հատվածներն իրարից բաժանված են ավելի ազատ՝ հանգստի հատվածով, որտեղ դրված է գրասենյակի գլխավոր սեղանը՝ մեծ և ամեն ինչի համար հարմար։
Ինչպես պատմեցին աշխատակիցները, հենց այս սեղանի շուրջ է տեղի ունենում ցանկացած կարևոր իրադարձություն՝ մեծ նախագծերի քննարկումից մինչև ծնունդներ և այլ միջոցառումներ։
Սեղանին են դրվում ծննդյան առիթների տորթերն ու մրգերը, այդտեղ են շարվում նաև խմիչքով բաժակները։ Ի դեպ, ՀայՓոստում չեն սպասում հատուկ առիթների, այլև տոնում են աշխատանքային շաբաթվա ավարտը՝ փոքրիկ փարթի կազմակերպելով ուրբաթ երեկոյան։ Front-end developer Գոռ Սարգսյանի խոսքով՝ շաբաթվա մյուս օրերին էլ սեղանին քաղցրավենիքի պակաս չի լինում, քանի որ հատկապես ՏՏ թիմում բոլորը քաղցրի սիրահար են։
Սեղանը կարևոր դեր է խաղում նաև թիմի նորեկների համար, քանի որ «հայփոստցիների ձեռնադրման արարողությունը» հենց դրա շուրջ է տեղի ունենում։ Այդ արարողության մասին սեփական փորձով մեզ հետ կիսվեց թվային մարքեթինգի մասնագետ Անժելա Չոբանյանը, ով մի քանի ամիս առաջ է միացել թիմին։
Այսպես, նորեկը հենց առաջին իսկ նշվող միջոցառմանը պետք է ցույց տա, որ պատրաստ է ինտեգրվել թիմին։ Իսկ ինչպե՞ս է դա տեղի ունենում։ «Վեդռո փարթիի» շրջանակում։
Որևէ առիթ նշելու դեպքում սեղանին է դրվում մեծ դույլը, որտեղ ողջ թիմը սիրով պատրաստում է գեղեցիկ, բայց անհայտ ծագման ինչ-որ կոկտեյլ՝ բազմազան մրգերով։ Ու եթե նորեկը չվախեցավ խմել այդ դույլից (իհարկե, ոչ ամբողջը), ընդունվում է թիմի կողմից՝ դառնալով դրա անբաժան մասը։ Անժելան փորձությունը պատվով է հաղթահարել։
Նմանատիպ արարողություն է տեղի ունենում նաև այն ժամանակ, երբ թիմը հրաժեշտ է տալիս իր որևէ անդամի։ Ինչպես մեզ պատմեցին՝ այդպիսով գնացող աշխատակիցը հասկանում է՝ «what happens in HayPost, stays in HayPost»։
Իսկ մեծ սեղանի առջև տեղադրված էկրանն օգտագործվում է թիմով որևէ պրեզենտացիա դիտելու համար, չնայած երբեմն նաև համատեղ կինոդիտման համար է ծառայում։
Սեղանի մոտակայքում կան նաև հանդիպումների և առանձին քննարկումների համար առանձնացված փափուկ հատվածներ, որոնք նաև օգտագործվում են open space-ի աղմուկից փախնելու և մի քիչ միայնակ մնալու համար։
Ու թեև մինչև գլխամասի գրասենյակի բացումը շենքի տարբեր հարկերում շատ ազատ սենյակներ կային, այժմ արդեն ողջ շենքը զբաղված է, քանի որ ՀայՓոստի թիմը դինամիկ աճում է։
Իսկ ռեբրենդինգն ու մշտապես իրականցվող ներքին բարեփոխումները ՀայՓոստ են բերում երիտասարդ մասնագետների, որոնք տեղում նաև փոխում են ընկերության կորպորատիվ մշակույթը՝ դարձնելով այն ավելի ժամանակակից ու գրավիչ։
