«Մարդը մարդ է․․․․ Մարդու էությունը նույնն է՝ անկախ ազգությունից։ Մարդը անվերջ է, մարդուն անվերջ կարելի է բացահայտել»։
Մեր հյուրի մասին
Beyond Podcast-ի տաղավարում այս անգամ հյուրընկալել ենք MerakiPal ընկերության հիմնադիր, տնօրեն, կազմակերպական զարգացման քոուչ, ինչպես նաև Հայաստանի երեխաների առողջության հիմնադրամի հոգաբարձուների խորհրդի անդամ Արմինե Մկրտչյանին, ում հետ զրուցել ենք առաջնորդության, կազմակերպությունների ներքին կոնֆլիկտների լուծման, էգոյից զատ առաջնորդության և ինքնագիտակցման կարևորության շուրջ։
Բժի՞շկ, ճարտարապե՞տ, թե՞․․․ Մանուկ հասակում երազանքի մասնագիտությունը դեռ հստակ ձևավորված չէր, սակայն արդեն ավելի հասուն տարիքում մի բան հստակ էր․ «Ուզում եմ աշխատել մարդկանց հետ»։
Կառավարում, հոգեբանություն, գեշտալտ քոուչինգ, 60-ից ավել կուրսեր տարբեր համալսարաններում․․․ Հենց այս բազմակողմանի կրթական ուղին էլ տարել է Արմինեին դեպի կազմակերպական զարգացման քոուչինգ։
Կազմակերպական զարգացման քոուչը, որի մասին ոմանք գուցե առաջին անգամ են լսում, այն մասնագետն է, որն օգնում է ընկերություններին, դրանց ղեկավարներին գտնել առկա խնդիրները, ձևակերպել դրանք և լուծել՝ նպաստելով ընկերության զարգացմանը։ Արմինեն կազմակերպությունը դիտարկում է որպես մարդ և վերլուծությունը հասցնում է առավել խորը մակարդակի՝ ոչ միայն տեսնելու, այլ նաև հասկանալու խնդիրը։ Որպես կանոն՝ խնդիրը միակողմանի չի լինում․ այնտեղ կան անձը և միջավայրը, այդ իսկ պատճառով խնդրի հետ աշխատելիս պետք է դիտարկել երկու կողմը՝ և՛ անձը, և՛ միջավայրը։ Շատ հաճախ մարդուն տեղափոխելով մեկ այլ միջավայր՝ ականատես ենք լինում վարքագծի դրական փոփոխության, և որպեսզի ճիշտ փոփոխություն կատարվի, անհրաժեշտ է հասնել խնդրի արմատներին։
Արմինեն մտահոգված է ոչ միայն կազմակերպությունների, այլ նաև երեխաների առողջությամբ և բարեկեցությամբ։ Արմինեի կյանքում հատուկ տեղ ու նշանակություն ունի Հայաստանի երեխաների առողջության հիմնադրամը, որի առաքելությունն է կանգնել բոլոր այն մարդկանց կողքին, որոնք իրենց երեխաների հետ մնացել են հիվանդության դեմ միայնակ։
Շարունակելով խոսել կազմակերպական զարգացումից՝ Արմինեն անդրադառնում է նաև լավ առաջնորդի կերպարին։ Առաջնորդ դառնու՞մ են, թե՞ ծնվում։ Այս հարցի պատասխանը կգտնես փոդքասթում, իսկ այստեղ կքննարկենք էգոյից զատ առաջնորդությունը։ Հաճախ մարդիկ իրենց որոշումները կայացնելիս առաջնորդվում են ոչ թե առողջ և օբյեկտիվ դատողությամբ, այլ լսում են իրենց մեջ ապրող փոքրիկ մարդուկին՝ էգոյին, որը նեղացկոտ է, վախկոտ ու հաճախ անգիտակից կողմնակալության պատճառ է դառնում։ Կազմակերպության մակարդակով որոշումների դեպքում հետևանքներն ավելի մեծ են, ուստի այստեղ պետք է շատ ավելի զգոն լինել։ Մեր հյուրը ղեկավարներին, առաջնորդներին և, առհասարակ, բոլոր մարդկանց խորհուրդ է տալիս զբաղվել ինքնավերլուծությամբ, բարձրացնել ինքնագիտակցման, ինքնաճանաչման մակարդակը։ Քանի որ եթե չգիտենք, թե ինչն է մեզ ցավ պատճառում, ինչն է մեզ վրդովեցնում, որոշումներ կայացնելիս շարունակելու ենք հիմնվել մեր թուլությունների վրա։
Առաջնորդության վերաբերյալ գրականությունից Արմինեն առանձնացնում է «Առաջնորդություն առանց էգոյի» գիրքը, որն ունակ է կրթելու օրինակելի առաջնորդի։ Հայաստանում գրքի գաղափարախոսությունը հասանելի դարձնելու նպատակով Արմինեն ստանձնել է գրքի թարգմանության ազգանվեր գործը։ Ի դեպ, Արմինեն կիսեց մեզ հետ մի շատ հաճելի գաղտնիք. գրքի շնորհանդեսին, որը նախատեսվում է հաջորդ տարի, Հայաստան կժամանի գրքի համահեղինակ Շեյն Հյուզը (Shayne Hughes)։
Զրույցը եզրափակեցինք Արմինեի հետաքրքիր հարցով՝ ուղղված յութուբյան մեր հետևորդներին․ «Ի՞նչն է ձեր մեջ ամենավառ ինքնագիտակցումը առաջացրել»։ Նշենք, որ լավագույն պատասխանի հեղինակի համար staff.am-ը պատրաստել է անակնկալ, իսկ Արմինեն իր կողմից կնվիրի «Ego free leadership» գիրքը։
Մեր գործընկերոջ մասին
Այս էպիզոդի գործընկերն է Hirebee ավտոմատացման համակարգը։ Hirebee-ի նպատակն է հեշտացնել թեկնածուների փնտրման, հավաքագրման, հարցազրույցների վարման, թեստավորման և իհարկե աշխատանքի ընդունման գործընթացները։ Եթե դուք էլ ցանկանում եք ավելի օպտիմալ և սահուն դարձնել հավաքագրման գործընթացը ձեր ընկերություններում, ապա գրանցվեք և փորձեք Hirebee-ն լիովին անվճար։
Զրույցին ամբողջությամբ ծանոթանալու համար խորհուրդ ենք տալիս դիտել էպիզոդը, որտեղ կբացահայտեք շատ ավելին։ Չմոռանա՛ք բաժանորդագրվել մեր յութուբյան ալիքին՝ մշտապես տեղեկացված և մոտիվացված լինելու համար։ Մաղթում ենք ձեզ հաճելի դիտում։
