Հոկտեմբերի 19-ին Երևանում մեկնարկել է Կենսաբազմազանության մասին կոնվենցիայի կողմերի 17-րդ համաժողովը՝ COP17-ը։ Առաջին օրվա ուշադրության կենտրոնում էին կենսաբազմազանության պահպանության միջազգային նպատակների իրականացման ընթացքը, ֆինանսավորման անհրաժեշտությունը և քաղաքական պարտավորությունները գործնական քայլերի վերածելու հարցը։

Հոկտեմբերի 19-30-ը Երևանը հյուրընկալում է ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովը։ COP17-ը կարևոր փուլ է միջազգային համագործակցության համար, քանի որ դրա շրջանակում առաջին անգամ իրականացվում է Կունմին-Մոնրեալի կենսաբազմազանության գլոբալ շրջանակի իրականացման հավաքական առաջընթացի համաշխարհային գնահատում։

2022 թվականին ընդունված այս շրջանակը սահմանում է մինչև 2030 թվականը կենսաբազմազանության կորուստը կասեցնելու և շրջադարձային փոփոխության հասնելու նպատակներ։ Դրանց թվում են ցամաքային և ծովային տարածքների առնվազն 30%-ի պահպանությունը, վնասված էկոհամակարգերի վերականգնումը և կենսաբազմազանության պահպանության համար ֆինանսական միջոցների ավելացումը։

COP17-ի պաշտոնական բացման արարողությանը մասնակցել են ՀՀ վարչապետ Նիկոլ Փաշինյանը, Ազգային ժողովի նախագահ Ռուբեն Ռուբինյանը, արտաքին գործերի նախարար Արարատ Միրզոյանը, շրջակա միջավայրի նախարար Համբարձում Մաթևոսյանը, Կենսաբազմազանության մասին կոնվենցիայի գործադիր քարտուղար Աստրիդ Շոմեյքերը, ինչպես նաև միջազգային պատվիրակությունների ներկայացուցիչներ։

Արարողության ընթացքում ներկայացվել են «Առաջնորդները՝ հանուն բնության» գագաթնաժողովի արդյունքները, ցուցադրվել են բնությանն ու մշակույթին նվիրված տեսանյութ և «Trace» գեղարվեստական ֆիլմը։ Ելույթներով հանդես են եկել Հայաստանի և միջազգային կառույցների ներկայացուցիչները, իսկ ՄԱԿ-ի Շրջակա միջավայրի ծրագրի գործադիր տնօրեն Ինգեր Անդերսենը հանդես է եկել տեսաուղերձով։

Համաժողովի մեկնարկը նշանավորում է առաջիկա երկու շաբաթների բանակցությունների սկիզբը, որոնց ընթացքում երկրները պետք է քննարկեն կենսաբազմազանության պահպանության նպատակների իրականացման ուղղությամբ հետագա քայլերը։

Համաժողովի առաջին օրվա կարևոր իրադարձություններից էր ՀՀ շրջակա միջավայրի նախարար Համբարձում Մաթևոսյանի՝ COP17-ի նախագահ ընտրվելը։

Նախագահության կարևոր խնդիրներից է աջակցել բանակցային գործընթացին, նպաստել կողմերի միջև երկխոսությանը և ընդհանուր լուծումների ձևավորմանը։ Համաժողովի ընթացքում ընդունվելիք որոշումները պետք է արտացոլեն մասնակից երկրների համատեղ աշխատանքն ու համաձայնությունները։

COP17-ի առանցքային ուղղություններից է Կունմին-Մոնրեալի կենսաբազմազանության գլոբալ շրջանակի իրականացման առաջին համաշխարհային գնահատումը։ Այն հնարավորություն է տալիս համադրել երկրների ստանձնած պարտավորություններն ու դրանց իրականացման ուղղությամբ արձանագրված առաջընթացը, բացահայտել բացերը և որոշել, թե ինչ քայլեր են անհրաժեշտ մինչև 2030 թվականը սահմանված նպատակներին հասնելու համար։

Միջազգային քննարկումներում առանձնահատուկ տեղ է զբաղեցնում նաև ֆինանսավորման հարցը։ Կենսաբազմազանության պահպանության համար անհրաժեշտ է ոչ միայն քաղաքական կամք, այլև բավարար ֆինանսական ռեսուրսներ, արդյունավետ միջազգային համագործակցություն և ստանձնած պարտավորությունների իրականացում։

Համաժողովի առաջին օրը կայացել է նաև «Առաջին համաշխարհային գնահատման գործնական իրականացումը․ բազմակողմ երկխոսություն» խորագրով քննարկումը, որը կազմակերպվել է Հայաստանի նախագահության միջոցառումների շրջանակում՝ IDDRI-ի գործընկերությամբ։

COP17-ի մեկնարկային օրը տեղի ունեցած մամուլի ասուլիսի ընթացքում ՀՀ շրջակա միջավայրի նախարար Համբարձում Մաթևոսյանը և Կենսաբազմազանության մասին կոնվենցիայի գործադիր քարտուղար Աստրիդ Շոմեյքերը ներկայացրել են համաժողովի առաջնահերթություններն ու ակնկալվող արդյունքները։

Նրանց անդրադարձած հիմնական ուղղություններն էին գլոբալ շրջանակի իրականացման առաջընթացի գնահատումը, ֆինանսական միջոցների ներգրավումը և միջազգային համագործակցության ամրապնդումը։

Նախարարն ընդգծել է, որ «Առաջնորդները՝ հանուն բնության» գագաթնաժողովն ու դրա արդյունքում ընդունված Երևանի հռչակագիրը կարևոր քաղաքական ազդակ են տվել համատեղ գործողությունների համար։ Այժմ խնդիրը ստանձնած պարտավորությունները համաձայնեցված որոշումների և գործնական քայլերի վերածելն է։

Հոկտեմբերի 20-ին COP17-ի շրջանակում նախատեսված է «Ավանդական գիտելիքը գործողության մեջ․ բնիկ ժողովուրդների և տեղական համայնքների ներդրումը Կունմին-Մոնրեալի կենսաբազմազանության գլոբալ շրջանակում» խորագրով միջոցառումը։ Այն կազմակերպվում է Հայաստանի նախագահության միջոցառումների ծրագրում՝ Բնիկ ժողովուրդների միջազգային ֆորումի, ՅՈՒՆԵՍԿՕ-ի և Փարիզի Բնական պատմության ազգային թանգարանի գործընկերությամբ։

Առաջիկա օրերին շարունակվելու են կենսաբազմազանության պահպանության նպատակների իրականացման, ֆինանսավորման, միջազգային համագործակցության և բնության պահպանության ոլորտում տարբեր շահագրգիռ կողմերի ներգրավման շուրջ քննարկումները։

COP17-ի առաջին օրը ձևավորեց համաժողովի հիմնական օրակարգը։ Այժմ ուշադրության կենտրոնում այն հարցն է, թե ինչպես միջազգային մակարդակով ստանձնած պարտավորությունները վերածել չափելի արդյունքների, որոնք կնպաստեն կենսաբազմազանության պահպանությանը մինչև 2030 թվականը։