Staff.am-ը շարունակում է «Հայաստանի լավագույն գրասենյակները» նախագիծը, որի նպատակն է ֆոտոպատմությունների տեսքով ներկայացնել Հայաստանում գործող ընկերությունների ամենատարբերվող, գեղեցիկ, հարմար, ոճային և տրամադրող գրասենյակները:
Նախագծի շրջանակում մենք այցելել ենք Digitain-ի գրասենյակ, թեև ավելի ճիշտ կլինի ասել՝ DigiTown, որն իր մեջ ներառում է ընկերության ոչ միայն գլխավոր մասնաշենքը, այլ նաև ուրիշ գրասենյակներ:
Գլխավոր մասնաշենքի բոլոր 11 հարկերն այնքան ոճային են ու տարբերվող, յուրաքանչյուր հարկում այնքան շատ բան կա տեսնելու, որ մեր շրջայցը տևեց մի քանի ժամ, ինչը, սակայն, երկար չթվաց, քանի որ հագեցած էր հետաքրքիր տեղեկատվությամբ ու գեղեցիկ տեսարաններով:
Ի դեպ, շենքից բացվում է գեղեցիկ տեսարան դեպի Երևանյան լիճ և Արարատ լեռ, որը հավելյալ ոգեշնչման աղբյուր է հանդիսանում Դիջիթեյնի աշխատակիցների համար։
Մինչ շենքի կառուցումը ընկերությունը մի քանի գրասենյակ է ունեցել Երևանի տարբեր հատվածներում, սակայն տնօրինությունը կարևորում էր բոլորին մի վայրում համախմբելու ու DigiTown հիմնելու գաղափարը։
Եվ 2020-ի վերջին – 2021-ի սկզբին շահագործման հանձնվեց Դիջիթեյնի գլխավոր մասնաշենքը, որի կառուցապատման ու ներքին հարդարանքի աշխատանքները շուրջ երեք տարի են տևել։
Դիջիթեյնը մշտապես հյուրեր է ընդունում աշխարհի տարբեր երկրներից, ուստի կարևոր է ներկայանալ ոչ միայն լավ պրոդուկտներով, աշխատանքով ու գաղափարներով, այլև՝ նորարարական գրասենյակով, որի ամեն հարկն առանձնանում է իր յուրօրինակ լուծումներով:
Գրասենյակի կահավորվածությունը, հանդիպման սենյակների ամրագրման համակարգը, աշխատասենյակների տեխնիկական հագեցվածությունը և առհասարակ միջավայրը Դիջիթեյնում «խոսում է» նորարարության լեզվով: Պատահական չէ, որ գրասենյակի յուրաքանչյուր հարկ կրում է հայ անվանի որևէ գյուտարարի անունը, ով իր նորարարությամբ փոխել է աշխարհը և այն դարձրել ավելի լավը: Ինչպես դիջիթեյնցիներն են ասում, սա ոգեշնչման աղբյուր է հանդիսանում նորարարության և գյուտարարության խթանման համար:
Յուրաքանչյուր հարկի աստիճանների հատվածը զարդարում է մեծ որմնանկար՝ պատկերելով հայ գյուտարարին և իր գյուտը։ Դիջիթեյնի գրասենյակ այցելող յուրաքանչյուր օտարերկրյա հյուր անպայման շրջայց է կատարում ընկերության բոլոր հարկերով՝ ծանոթանալով հայ մտքի ուժին:
Իսկ 10-րդ հարկի պատերն ու առաստաղը զարդարում են հայկական զարդանախշեր՝ ներդաշնակ կերպով համադրելով նորարարականն ու ազգայինը:
Հարկերի աշխատանքային հատվածները հիմնականում open space ձևաչափով են նախագծված, բացառությամբ մի քանի հարկի, որտեղ ավելի փակ գրասենյակային ձևաչափն է կիրառվել՝ ելնելով կոնկրետ թիմի աշխատանքի բնույթից:
Հարկից հարկ դիզայնն ու երանգային լուծումները ևս փոխվում են։
Մեր կարծիքով՝ դժվար է 2000 և ավել աշխատակից ունեցող կազմակերպությունում մինիմալի հասցնել խառնաշփոթը և պահպանել կորպորատիվ մշակույթն ու ներքին հաղորդակցությունը, բայց Դիջիթեյն ընկերությանը հաջողվել է հասնել այն ջերմ ու ընկերական միջավայրին, որը մաքսիմալ պրոդուկտիվություն է ապահովում։ Հետաքրքիր սովորույթ նկատեցինք․ բոլոր աշխատակիցները՝ անկախ իրենց թիմերից ու միմյանց անձամբ ճանաչելուց, միշտ ջերմորեն բարևում են իրար վերելակում կամ միջանցքներում հանդիպելիս։
Այս ամենում իր մեծ ներդրումն ունի HR թիմը․ մարդկային ռեսուրսների կառավարման շուրջ 40 մասնագետ աշխատում է այս մեծ թիմում առողջ մթնոլորտն ապահովելու ու պահպանելու համար։ Շեշտը դրվում է մարդուն որպես մասնագետ և անհատ գնահատելու վրա։ Յուրաքանչյուր դիջիթեյնցի պետք է վստահ լինի, որ իր բոլոր ջանքերը նկատելի են ու գնահատվում են։
Անկաշկանդ շփմանն ու ընկերական մթնոլորտի ձևավորմանը նպաստում են նաև պարբերական բնույթ կրող թիմբիլդինգները, ինչպես նաև ներքին միջոցառումները, մրցաշարերը, հյուրասիրությունները, ստանդարտ և ոչ ստանդարտ տոները միասին նշելը, ինչպես օրինակ՝ Սուրճի միջազգային օրը կամ գարնան սկիզբը։
Բացի այդ, Դիջիթեյնում ստեղծված են բոլոր պայմանները ողջ օրն աշխատավայրում անցկացնելու և չձանձրանալու, չհոգնելու համար։ Այդ իսկ պատճառով, օրինակ, շենքի հարակից տարածքում կա գեղեցիկ ու հարմար այգի՝ շատրվանով, նստարաններով ու ճոճանակներով, որտեղ դիջիթեյնցիները պարբերաբար մաքուր օդին հանգիստ ու հաճելի ժամանակ են անցկացնում։
Իսկ գլխավոր մասնաշենքի առաջին հարկում գործում է ոչ մեծ, բայց շատ հարմարավետ սրճարանը, որտեղ աշխատակիցները կարող են կազմակերպել իրենց ընդմիջումը, գործնական հանդիպումներ անցկացնել կամ պարզապես վայելել թեյ, սուրճ, քաղցրավենիք և տեղում պատրաստվող թարմ խմորեղեն։
Դիջիթեյնցիներն իրենց ընդմիջումը նաև անցկացնում են DigiTown-ի մաս կազմող FoodPark by Downtown-ում, որտեղի բազմազան ճաշացանկում յուրաքանչյուր ոք կարող է գտնել իր ճաշակին համապատասխան ուտեստներ։
Գլխավոր մասնաշենքի տարածքում հնարավորություն կա նաև խաղալ ֆուսբոլ (սեղանի ֆուտբոլ), շախմատ, ինտելեկտուալ այլ խաղեր կամ PlayStation։ Ինչպես նաև հանգստանալ ու էներգիա հավաքել հատուկ նախատեսված հանգստի գոտիներում կամ բացօթյա պատշգամբում։
Իսկ ահա իրական ֆուտբոլի, բասկետբոլի, վոլեյբոլի և մեծ թենիսի սիրահարների համար DigiTown-ի տարածքում՝ FoodPark by Downtown-ի տանիքում, գործում է մեծ ու գեղեցիկ մարզադաշտ, որտեղ աշխատակիցները կարող են խաղալ և մարզվել պրոֆեսիոնալ մարզիչների ուղղորդմամբ:
Ի դեպ, Դիջիթեյնի աշխատակիցների համար տարածքում հասանելի է նաև անվճար մերսման ծառայություն։
Ընկերությունում վստահ են՝ մանրուքները շատ կարևոր են։ Հենց այդ է պատճառը, որ գրասենյակի ողջ տարածքի նախագծման ժամանակ մեծ ուշադրություն է դարձվել մանրուքներին։ Ոչինչ չպետք է խանգարի աշխատակցին, ոչինչ չպետք է անհարմարություն պատճառի, այլ` հակառակը։
Բոլոր հարկերում հատուկ կետային լուսավորություն է տեղադրված, որպեսզի ողջ օրը համակարգիչների առջև անցկացնող մասնագետների աչքերը չհոգնեն և անհանգստություն չպատճառեն։
Առանձին ուշադրություն է դարձվել նաև աշխատասենյակներում մշտական մաքուր օդի մատակարարմանը։ Օդափոխության համակարգը հատուկ ռեժիմներով է աշխատում, որպեսզի գրասենյակներում թթվածնի պակաս չլինի։
Թեև Դիջիթեյնի շուրջը բուսականությունը դեռ այդքան էլ շատ չէ, այս բացը կոմպենսացվել է շենքի ներսում առկա բնական բուսականությամբ։ Գրասենյակի տարբեր հատվածներ զարդարում են բնական բույսեր, որոնք խնամում են պրոֆեսիոնալ մասնագետներ։
Մեծ ուշադրություն է դարձվում նաև շենքի արտաքին և ներքին տեսքը միշտ կոկիկ, մաքուր ու թարմ պահելուն։ Ընկերությունն իր առջև նպատակ է դրել պահպանել գրասենյակի տեսքն այնպիսին, ինչպիսին այն նախագծվել է։ Դրա համար ցանկացած փոքրիկ խազ կամ բիծ շենքի պատին միանգամից վերականգնվում է և մաքրվում, որպեսզի դիջիթեյնցիներն իրենց աշխատավայրը միշտ նոր ու գեղեցիկ տեսնեն։
Դիջիթեյնն ունի սեփական ընդարձակ ավտոկայանատեղի, որը հնարավորություն է տալիս մեծաթիվ աշխատակիցների հանգիստ կայանել իրենց մեքենաները։ Իսկ DigiTown-ի՝ ապագայում կառուցվելիք մյուս շինությունները կունենան նաև մի քանի հարկից բաղկացած փակ ավտոկայանատեղի։
Ընկերությունն ամեն ինչ անում է իր աշխատակիցներին առավելագույնս մոտիվացնելու համար։ Հենց դա է պատճառը, որ Դիջիթեյնում աշխատակիցների հոսունության ցուցանիշը ցածր է. մասնագետները տարիներ շարունակ աշխատում են ընկերությունում և հենց այստեղ կերտում իրենց մասնագիտական ուղին։
Իսկ հիմա շարունակաբար աճող ու համալրվող թիմն անհամբեր սպասում է DigiTown-ի՝ իր փոքրիկ քաղաքի վերջնական իրագործմանը, որը է՛լ ավելի հարմար ու հաճելի միջավայր կստեղծի բոլոր դիջիթեյնցիների համար։
