staff.am-ը շարունակում է «Հայաստանի լավագույն գրասենյակները» նախագիծը, որի նպատակն է ֆոտոպատմությունների տեսքով ներկայացնել Հայաստանում գործող ընկերությունների ամենատարբերվող, գեղեցիկ, հարմար, ոճային և տրամադրող գրասենյակները։Նախագծի շրջանակում մենք այցելել ենք Foundation for Armenian Science and Technology ( FAST ) գրասենյակ, որի վառ ու տրամադրող միջավայրում ստեղծվում և կյանքի են կոչվում Հայաստանի ապագայի համար կարևոր գիտական, կրթական և նորարարական նախագծեր։
FAST-ն այդ գրասենյակ է տեղափոխվել 2018-ի օգոստոսին։ Այդ ժամանակ թիմը դեռ փոքր էր՝ մոտ 10 հոգուց բաղկացած, սակայն արագ աճում էր։ Այժմ FAST-ի հիմնական թիմը 40 հոգուց է բաղկացած, սակայն պարբերաբար ավելանում են նոր մարդիկ՝ ձևավորելով նոր ստարտափներ, իսկ այնուհետև առանձնանում
Երբ FAST-ն ընտրեց նշված տարածքն իր գրասենյակի համար, այդ վայրում դեռ ոչինչ չկար՝ անմխիթար քարուքանդ տարածք էր, իսկ ներսում 4 մեծ լքված մեքենա էր կանգնած, և այդ ամենը շինության 2-րդ հարկում։
Տարածքում կային միայն սյուները, որոնք էլ հիմքը դարձան այժմյան գեղեցիկ գրասենյակի։
Նույնիսկ պատուհաններ չկային։ Բոլոր աշխատանքները զրոյից են իրականացվել։
Հիմնադիր տնօրեն Արմեն Օրուջյանի խոսքով՝ մեծ մարտահրավեր էր այդ ամայի տարածքին «կյանք տալը»՝ թե՛ բուսականության միջոցով, թե՛ վառ գույների, թե՛ լավ մարդկանց։
Գրասենյակը վառ գույներով է աչքի ընկնում։ Դա արվել է նաև մի շատ կարևոր նպատակով՝ դարձնել գիտությամբ զբաղվող մարդկանց միջավայրը գրավիչ հատկապես երիտասարդների համար, որպեսզի կոտրվի այն կարծրատիպը, որ գիտնականն անպայման լաբորատորիայում աշխատող պապիկ է։
Գրասենյակի դիզայնի մշակման հարցում մեծապես ներգրավված է եղել հիմնադրամի դիզայներ Լիլիթ Հարությունյանը։ Ու թեև Լիլիթը գրաֆիկ դիզայներ է, սակայն ինտերիեր դիզայնի նրա փորձն այնքան հաջողված է, որ մինչ օրս FAST-ի նոր պատերի տեսքը նա է որոշում և նախագծում։
FAST-ի գրասենյակի համար որպես հիմնական թեմա է ընտրվել Jungle-ը (ջունգլի)․ այստեղ որոշիչ էր Արմեն Օրուջյանի սերն Աֆրիկայի նկատմամբ, որտեղ FAST-ի հիմնադիր տնօրենը հասցրել է աշխատել մինչև Հայաստան գալը։ Եվ իսկական ջունգլի ապահովելու համար գրասենյակի գրեթե ողջ տարածքում առատ բուսականություն կա, ինչը հետաքրքիր ու յուրօրինակ կոնտրաստ է ստեղծում աշխատանքային միջավայրի հետ։ Գաղափարի հիմքում տեխնոլոգիաների և բնության միաձուլումն է։
Գրասենյակի հենց մուտքի մոտից է սկսվում կանաչ հատվածը։ Առաջին հայացքից թվում է, թե պատերով բարձրացող բույսերն արհեստական են, բայց մոտենալուն պես երևում է, որ իսկական են ու անչափ գեղեցիկ։
Բույսերը հատուկ խնամք են պահանջում․ շաբաթական 2-3 անգամ գրասենյակ է այցելում ֆլորիստը և խնամում է դրանք։
Գրասենյակի աշխատանքային հատվածը open space-ի սկզբունքով է, ընդհանրապես գրասենյակի ողջ տարածքում գերիշխում է ազատության ու բաց լինելու սկզբունքը՝ խոհանոցը և հանգստի հատվածները ևս առանձնացված չեն պատերով, իսկ կոնֆերանս սենյակների և առանձին սենյակների դռներն ապակյա են, ինչը ևս ապահովում է ընդհանուր թեթևությունը։
FAST-ի մարդկային ռեսուրսների պատասխանատու Ռուզաննա Աղաջանյանի խոսքով՝ open space-ը նպաստում է գրասենյակում ավելի ակտիվ շփմանն ու մտքերի փոխանակմանը, ինչն էլ իր հերթին նպաստում է ավելի լավ գաղափարների ստեղծմանը։
Խոհանոցի հատվածը նույնպես առանձնացված չէ, քանի որ դիտարկվում է որպես ևս մեկ վայր, որտեղ աշխատակիցները կարող են ազատ շփվել ու գաղափարներ փոխանակել։
Բացի բուն աշխատանքային հատվածից, կարելի է աշխատել գրասենյակի տարբեր հատվածներում, ընդ որում՝ թե՛ աշխատել, թե՛ հանգստանալ։ Ընտրությունը մեծ է՝ մեծ խմբերի համար նախատեսված գունավոր զոնաներից մինչև ավելի առանձնացված փափուկ հատվածներ։ Եվ բոլոր հատվածները որքան գեղեցիկ են, նույնքան՝ հարմար։
FAST-ում աչքի է ընկնում նաև հիմնադրամի ձեռքբերումների պատը, որտեղ ներկայացված են բոլոր նախագծերը, կան տվյալներ մասնակիցների քանակի, ներդրումների, հատկացված գրանտերի և գործունեության մյուս կարևոր տարրերի վերաբերյալ։
Աշխատանքային հատվածում հատկապես աչքի է ընկնում Integrity գրվածքով պատը, որի հեղինակը ևս Լիլիթն է։ Գրվածքը մեխերին փաթաթած գունավոր թելերով է ստացված և խորհրդանշում է այդքան տարբեր ու «բազմերանգ» մարդկանցից բաղկացած թիմի ամբողջականությունը՝ ընդգծելով, որ FAST-ում հավաքված մարդիկ թեև շատ հարցերում իրար նման չեն, սակայն հավաքվել են մեկ միասնական նպատակի շուրջ՝ ավելի լավը դարձնել Հայաստանի ապագան։
Ընդհանրապես FAST-ում պատերի գրվածքներին մեծ ուշադրություն են դարձնում, չէ՞ որ աշխատանքային օրվա ընթացքում աչքի ընկած որևէ լավ արտահայտություն կարող է թե՛ նպաստել նոր գաղափարի ստեղծմանը, թե՛ բարձրացնել տրամադրությունը։
FAST-ի թիմը երկար էր մտածում՝ ինչ կարելի է գրել այս պատին, դիտարկվել են շատ լուրջ մտքեր, բայց վերջում հաղթել է հին ու բարի, դեռևս մուլտֆիլմերից բոլորին ծանոթ Hakuna Matata-ն, ինչը սուահիլիից բառացի թարգմանվում է «ոչ մի հոգս»։ Կարծքում են՝ լավ ու ճիշտ նշանաբան է։
Հարմար տեղավորվելու և լիցքաթափվելով աշխատելու համար գրասենյակում կա գունավոր ու շատ փափուկ մի սենյակ, որտեղ պարզապես անհնար է գտնվել վատ տրամադրությամբ կամ լարված։ Ռուզաննան՝ որպես փորձառու HR մասնագետ, հատկապես բարձր է գնահատում սենյակի այդ առանձնահատկությունը և հաճախ օգտվում է դրանից աշխատակիցների հետ բարդ զրույցներն ավելի թեթև միջավայրում անցկացնելու համար։
Աշխատանքային եռուզեռի ընթացքում երբեմն շատ կարևոր է կտրվել գործերից ու գտնել ներքին հանգստությունն ու ներդաշնակությունը։ Այդ հարցում «ֆասթցիներին» օգնում է Zen սենյակը։ Մեդիտացիա անելու մշակույթ ձևավորելու համար գրասենյակ շաբաթական մեկ անգամ հատուկ ինստրուկտոր է գալիս, ով ցանկացող աշխատակիցներին օգնում է բացահայտել ներդաշնակությանը հասնելու ճանապարհը։
Մեդիտացիան գնալով ավելի սովորական ու առօրյա է դառնում հիմնադրամի աշխատակիցների համար, և շատերն արդեն ըստ ցանկության՝ նույնիսկ առանց մասնագետի օգնության, պարբերաբար այցելում են այդ սենյակ սեփական մտքերի հետ միայնակ մնալու համար։ Դա թույլատրվում է անել նաև աշխատանքային ժամերին, ոչ թե աշխատանքից դուրս կամ ընդմիջման հաշվին։
Zen zone-ին կից կա նաև հանգստի հատված, որտեղ աշխատակիցները կարող են նույնիսկ մի քիչ քնել։ Դա ևս կարելի է անել աշխատանքային ժամին, ու ղեկավարությունը որևէ խնդիր դրանում չի տեսնում։
FAST-ում նաև ավելի ակտիվ ժամանցն է ողջունվում․ ընկերության աշխատակիցները շատ են սիրում խաղալ ֆուսբոլ (սեղանի ֆուտբոլ), անգամ առաջնություններ են կազմակերպում։ Ինչպես պատմում է Ռուզաննան՝ նույնիսկ նախկին աշխատակիցներն են երբեմն այցելում գրասենյակ թիմով ֆուսբոլ խաղալու, դա FAST-ի մշակույթի մի մասն է։
Գրասենյակում ազատությունն ամենուր է․ հենց դա է պատճառը, որ տեղադրվել են ապակյա և ամբողջությամբ թափանցիկ դռներ՝ ընդհանուր բաց միջավայրի կոնցեպտը պահպանելու համար։
FAST-ի գրասենյակում ամեն անկյուն հարմարեցված է թե՛ պրոդուկտիվ աշխատանքին, թե՛ անկաշկանդ շփմանը, քանի որ հիմնադրամում համոզված են՝ լավագույն գաղափարները հենց այդպես են ծնվում։
FAST-ը նաև նոր գրասենյակի կառուցման ապագայի մեծ պլաններ ունի, որոնց իրականացման դեպքում մեր քաղաքում կավելանա ևս մեկ գեղեցիկ աշխատանքային միջավայր, որտեղ գեներացվելու են Հայաստանի ապագայի զարգացմանը նպաստող մեծ գաղափարներ։
Իսկ մենք վստահ ենք, որ ինչ էլ որոշի ստեղծել FAST-ի պես պրոդուկտիվ թիմը, արդյունքը լինելու է տպավորիչ և օրինակելի։
