Հոկտեմբերի 31-ին Գաֆէսճյան արվեստի կենտրոնում հանդիսավոր կերպով տրվեց Plug and Play միջազգային աքսելերացիոն ծրագրի մեկնարկը, որի ընթացքում հայտարարվեցին 26 շաբաթյա ծրագրին մասնակցության հնարավորություն ստացած հայկական 20 ստարտափների անունները։ Դրանց շարքում է staff.am-ի հիմնադիրների կողմից ստեղծված հավաքագրման ավտոմատացման Hirebee հարթակը, որն օգնում է ընկերություններին ավտոմատացնել հավաքագրման գործընթացը արհեստական բանականության օգնությամբ։
Hirebee-ն հավաքագրման ավտոմատացման ամբողջական համակարգ է` նախատեսված միջին և մեծ ընկերությունների համար։ Այն առաջարկում է նորարարական լուծումներ աշխատանքի ընդունման և աշխատակիցների ներգրավման համար՝ օգտագործելով արհեստական բանականության տեխնոլոգիաները: Hirebee-ի հնարավորություններից օգտվում են այնպիսի ընկերություններ, ինչպիսիք են ՀՀ կենտրոնական բանկը, Ամերիաբանկը, Արդշինբանկը, Հայաստանում Ամերիկյան Համալսարանը ու շատ այլ ընկերություններ։ Իսկ հարթակի արտերկրի հաճախորդների աշխարհագրությունը շատ ընդարձակ է՝ ԱՄՆ, Եվրոպա, Միջին Արևելք և Ասիա։
Plug and Play-ը Սիլիկոնյան հովտում գտնվող աշխարհի առաջատար և խոշորագույն նորարարական կենտրոններից մեկն է, որը կապում է ստարտափներին, կորպորացիաներին, վենչուրային կապիտալի ընկերություններին, համալսարաններին և պետական մարմիններին։ ՀՀ բարձր տեխնոլոգիական արդյունաբերության նախարարության ռազմավարական աջակցությամբ այս նախաձեռնությունը կարևոր փուլ է նախանշում Հայաստանի արագ զարգացման և նորարարության ու տեխնոլոգիաների կենտրոն դառնալու ճանապարհին:
Աքսելերացիոն ծրագրին մասնակցության հայտ ներկայացրած 120 ստարտափներից ընդամենը 20-ին է հաջողվել առանձնանալ իրենց նորարարական և յուրահատուկ լուծումներով։ Ընտրված ստարտափները տարբեր ոլորտներից են, ինչն ապահովում է սիներգիան այդ ոլորտների միջև՝ խթանելով ինովացիան։
Ծրագրի հիմնական նպատակներից է հայաստանյան ստարտափներին միջազգային շուկա դուրս գալու հնարավորություն տալը։
Աքսելերացիոն ծրագրի շրջանակում Hirebee-ն բացառիկ հնարավորություն կունենա համագործակցելու փորձառու մենթորների հետ, կապեր հաստատելու գործընկերների հետ ամբողջ աշխարհում և մասնակցելու մասնագիտացված միջոցառումներին ու սեմինարներին:
Plug and Play աքսելերացիոն ծրագիրը հաղթանակ է ոչ միայն 20 մասնակիցների, այլև Հայաստանի ողջ ստարտափ-էկոհամակարգի համար։ Սա մեծ և կարևոր քայլ է Հայաստանը տեխնոլոգիական կենտրոն դարձնելու ճանապարհին։ Հայկական ստարտափները, ի դեմս Hirebee-ի, ունեն մեծ ներուժ և կարող են մրցունակ լինել համաշխարհային մակարդակում։
Իսկ մենք խոստանում ենք staffmedia.am հարթակում կրկին անդրադարձ կատարել միջազգային աքսելերացիոն ծրագրի ընթացքին։
