Երբ աշխատանքը չի գոհացնում, առաջին ցանկությունը հաճախ հնարավորինս արագ նոր աշխատանք գտնելն է։ Սկսում եք ավելի հաճախ ստուգել թափուր հաստիքները, ուղարկել CV-ն և մտածել՝ արդյոք արժե ընդունել առաջին իսկ առաջարկը։

Բայց այստեղ մի հետաքրքիր պարադոքս կա․ երբ ամեն գնով աշխատանք գտնելու կարիք չունեք, ավելի մեծ հնարավորություն ունեք գտնելու այն աշխատանքը, որն իսկապես համապատասխանում է ձեզ։

Պատճառը միայն այն չէ, որ գործող աշխատանք ունենալը ֆինանսական կայունություն է ապահովում։ Այն փոխում է նաև աշխատանքի որոնման ընթացքը, որոշումների կայացման ձևը և այն չափանիշները, որոնցով գնահատում եք նոր հնարավորությունները։

Երբ աշխատանքից հեռանալը դառնում է հրատապ անհրաժեշտություն, ուշադրությունը հաճախ կենտրոնանում է մեկ հարցի վրա՝ որտե՞ղ կարող եմ հնարավորինս շուտ աշխատանքի անցնել։

Այդ ընթացքում կարող են երկրորդական դառնալ այնպիսի հարցեր, ինչպիսիք են՝ արդյոք նոր դպաշտոնը համապատասխանում է ձեր երկարաժամկետ նպատակներին, ինչպիսի՞ն է թիմի աշխատանքային մշակույթը, կա՞ մասնագիտական աճի հնարավորություն, և արդյոք առաջարկվող վարձատրությունը համարժեք է պատասխանատվությանը։

Իսկ երբ շտապելու անհրաժեշտություն չկա, կարող եք ավելի հանգիստ համեմատել տարբերակները, ուսումնասիրել ընկերությունները և հասկանալ՝ որ հնարավորությունն է իսկապես արժանի ձեր ուշադրությանը։

Այս դեպքում աշխատանքի փոփոխությունը դառնում է ոչ թե պարզապես ներկա իրավիճակից դուրս գալու միջոց, այլ մասնագիտական հաջորդ քայլը ճիշտ ընտրելու հնարավորություն։

Գործող աշխատանքը, նույնիսկ եթե այն ամբողջությամբ չի բավարարում ձեզ, կարող է օգտակար հենակետ լինել։ Դուք արդեն որոշակի պատկերացում ունեք այն մասին, թե ինչն է ձեզ մոտիվացնում, ինչպիսի թիմում եք արդյունավետ աշխատում և որ պայմաններն են կարևոր ձեր մասնագիտական զարգացման համար։

Աշխատանքի փոփոխության ընթացքում բանակցելը միայն աշխատավարձի մասին խոսելը չէ։ Դա նաև ձեր փորձը ներկայացնելու, պարտականությունների շրջանակը հստակեցնելու և աշխատանքային պայմանների շուրջ հարցեր տալու կարողությունն է։

Երբ նոր աշխատանք գտնելը հրատապ անհրաժեշտություն չէ, ավելի հեշտ կարող է լինել քննարկել առաջարկի մանրամասները, պարզել սպասելիքները և որոշել՝ արդյոք պայմաններն ընդունելի են ձեզ համար։

Սա, իհարկե, չի նշանակում, որ գործող աշխատանք ունեցող յուրաքանչյուր թեկնածու ավելի ուժեղ բանակցային դիրքում է։ Շատ բան կախված է պահանջված մասնագիտությունից, փորձից և գործատուի կարիքներից։ Սակայն ընտրության ավելի մեծ ազատությունը կարող է օգնել չհամաձայնել այնպիսի պայմանների, որոնք երկարաժամկետ հեռանկարում ձեզ չեն բավարարի։

Աշխատանքի որոնումը պարտադիր չէ վերածել ամենօրյա, ժամեր խլող զբաղմունքի։ Հատկապես երբ արդեն աշխատում եք, կարևոր է նոր հնարավորություններին հետևելու հարմար ձև գտնել։

Օրինակ՝ կարող եք նախապես որոշել, թե ինչ պաշտոններ, ոլորտներ կամ աշխատանքային պայմաններ եք դիտարկում, և պարբերաբար ուսումնասիրել համապատասխան հայտարարությունները։ Այդպես ստիպված չեք լինի ամեն անգամ զրոյից սկսել որոնումը կամ դիմել բոլոր այն հաստիքներին, որոնք առաջին հայացքից հետաքրքիր են թվում։

Այստեղ կարող են օգնել նաև staff.am-ի Job Alerts ծանուցումները․ սահմանելով ձեր նախընտրություններին համապատասխան որոնումը՝ կարող եք տեղեկանալ նոր հայտարարությունների մասին՝ առանց աշխատանքի որոնումը մշտապես բաց պահելու։

Նպատակը հնարավորինս շատ հայտարարություններ դիտելը չէ։ Նպատակն այն հնարավորությունները ժամանակին նկատելն է, որոնք կարող են ձեր մասնագիտական հաջորդ քայլը դառնալ։

Այս մոտեցումը չի նշանակում, որ պետք է մնալ աշխատանքում, որն այլևս չի համապատասխանում ձեզ, կամ անտեսել մասնագիտական աճի բացակայությունը։

Աշխատանքի որոնումը կարելի է սկսել ոչ միայն այն ժամանակ, երբ այլևս չեք կարող մնալ, այլև այն ժամանակ, երբ պատրաստ եք մտածել հաջորդ քայլի մասին։

Երբեմն նոր աշխատանք գտնելու համար ամենաարդյունավետ քայլը շտապելը չէ։ Դա սեփական առաջնահերթությունները հասկանալն է, հնարավորություններին հետևելը և որոշում կայացնելը՝ հիմնվելով ոչ միայն ներկա դժգոհության, այլև ապագա նպատակների վրա։

Չէ՞ որ աշխատանքի փոփոխության հաջողությունը չափվում է ոչ թե նրանով, թե որքան արագ եք հեռանում նախորդ աշխատանքից, այլ նրանով, թե որքան ճիշտ է ընտրված հաջորդը։

Պետք չէ սպասել, մինչև աշխատանք փոխելը դառնա հրատապ։ Կարելի է սկսել փնտրել այն ժամանակ, երբ դեռ ունեք ընտրելու ազատություն։ Ծանոթացիր նոր հնարավորություններին և ընտրիր քո հաջորդ կարիերային քայլը staff.am-ում։