Հունիսը իրադարձություններով լի ամիս էր թե՛ Հայաստանի աշխատաշուկայի համար, թե՛, մասնավորապես, ՏՏ ոլորտի ընկերությունների։
staff.am-ը շարունակում է իր նոր նախագիծը՝ MND-ն (Monthly News Digest), որի շրջանակում մենք յուրաքանչյուր ամիս հակիրճ ներկայացնում ենք մեր գործընկեր ընկերությունների վերջին նորությունները։
Hirebee
Հունիսը Hirebee-ի համար հագեցած էր և հետաքրքիր միջոցառումներով լի։ Ամիսը սկսվեց EMERGE միջազգային տեխնոլոգիական համաժողովին մասնակցությամբ, որն անցկացվել է հունիսի 1-2-ը Երևանում։ Hirebee-ն 2 օր շարունակ ակտիվորեն մասնակցել է համաժողովին՝ նոր կապեր ու ծանոթություններ հաստատելով և EMERGE-ի հազարավոր մասնակիցներին ներկայացնելով հավաքագրման ավտոմատացման համակարգի հնարավորությունները։
Ամսվա երկրորդ խոշոր միջոցառումը հունիսի 15-18-ը Փարիզում կայացած Viva Technology 6-րդ ամենամյա միջազգային խոշոր տեխնոլոգիական համաժողովն էր, որին մասնակցում էին աշխարհի ՏՏ և հարակից ոլորտների հազարավոր ընկերություններ, այդ թվում՝ շուկայի առաջատարները։ Hirebee-ն համաժողովին մասնակցել է հայկական միասնական տաղավարով՝ ընտրվելով բազմաթիվ հայկական ընկերություններից և ստարտափներից ու ընդգրկվելով երկիրը ներկայացնող տեխնոլոգիական ոլորտի 9 ընկերության ցանկում։ Միջոցառման ընթացքում Hirebee-ն գրավել է տեխնոլոգիական աշխարհի խոշոր ներկայացուցիչների ուշադրությունն ու ձեռք բերել հեռանկարային պայմանավորվածություններ։
OMD
Հունիսի 25-ին տեղի ունեցավ IT Intellectual Cup 2022 ինտելեկտուալ մրցույթը, որին մասնակցում էր 30-ից ավելի թիմ ՏՏ ոլորտի ընկերություններից: Առաջին տեղը գրավեց OMD ընկերության թիմը:
OMD ընկերությունն այս տարի նշում է իր գործունեության 15 տարին: Այն հանդիսանում է ամերիկյան OneMarketData ընկերության դուստր ընկերությունը: OneMarketData ընկերությունը մշակում է բորսայական տվյալների պահպանման և վերլուծության սեփական համակարգը, ինչպես նաև մատակարարում է տվյալներ և վերլուծական համակարգեր: Ընկերության հաճախորդների շարքում են խոշորագույն ֆինանսական հաստատություններ (Նյու-Յորքի ֆոնդային բորսա, Сredit Suisse, Vanguard և այլոք):
Synopsys Armenia
Սինոփսիս Արմենիան՝ Synopsys ընկերության ամենամեծ մասնաճյուղն ԱՄՆ-ից դուրս, հունիսի 13-ին հյուրընկալել էր Հայաստանի Հանրապետության նախագահ Վահագն Խաչատուրյանին և մոլեկուլային կենսաբան, նյարդաբան, բժշկագիտության 2021 թ. Նոբելյան մրցանակակիր, Scripps Research ինստիտուտի պրոֆեսոր Արդեմ Փաթափությանին, ով Հայաստան է եկել ՀՀ էկոնոմիկայի նախարարության հովանու ներքո իրականացվող «Գիտության և Գործարարության օրեր» միջոցառման շրջանակում: Հյուրերը շրջայց են կատարել ընկերությունով, ծանոթացել դրա գործունեությանը։ Այցն ավարտվել է հարցուպատասխանի ձևաչափով պանելային քննարկմամբ։ Նախագահ Խաչատուրյանը, Նոբելյան մրցանակակիր Արդեմ Փաթափությանն ու Սինոփսիս Արմենիայի Նախագահ Երվանդ Զորյանը զրուցել են ընկերության աշխատակիցների և հյուրերի հետ, անդրադարձել նրանց հետաքրքրող հարցերին:
iSpace
Երևանում Apple Authorised Reseller կարգավիճակով բացվել է Apple-ի հայաստանյան առաջին պաշտոնական գործընկեր՝ iSpace սրահը։ Բացմանը ներկա էին մի շարք հյուրեր, որոնք տեղում հնարավորություն ունեցան ծանոթանալու սրահի պայմաններին և տեսականուն։ Նորաբաց iSpace-ը Apple-ի պաշտոնական գործընկերն է, պաշտոնապես հավաստագրված է համաշխարհային գիգանտի կողմից և լիարժեք համապատասխանում է բոլոր միջազգային ստանդարտներին։ Սրահում ներկայացված է Apple ընկերության պաշտոնական արտադրանքի ամբողջական առկա տեսականին, խոսքն էքսկլյուզիվ պրոդուկտների մասին է՝ Mac, iPhone, iPad, Apple Watch, AirPods։
Kindda
Տարվա սկզբին Kindda ընկերությունը տեղափոխվեց նոր գրասենյակ, սակայն գրասենյակի վերանորոգման և հարդարման աշխատանքները վերջերս են ավարտվել։ Այժմ միջազգային Kindda-ի հայաստանյան թիմը, որի մեջ մտնում է մոտ 90 մասնագետ, նոր ու հարմար պայմաններում է աշխատում՝ գեղեցիկ և ոճային գրասենյակից։ Գրասենյակը շատ մեծ է և նախատեսված է էլ ավելի մեծ թիմի համար, ուստի Kindda-ն հնարավորություն ունի մեծացնելու իր թիմը կամ տեղափոխելու այլ երկրների, օրինակ՝ Ռուսաստանի, թիմերի մի մասը Հայաստան։
