2022 թվականի մարտին QLess միջազգային ընկերությունը պաշտոնապես բացեց իր առաջին գրասենյակը Երևանում։
Ընկերությունն իր շուկան, մասնավորապես՝ ԱՄՆ-ում, ընդլայնելու համար կատարելագործում է իր տեխնոլոգիական հարթակը: Այդ նպատակով թիմն ընդլայնելու անհրաժեշտություն է առաջացել, ինչն էլ QLess-ին բերել է Հայաստան, որտեղ իր գործունեությունը սկսել է ծավալել դեռևս 2020 թվականից՝ համագործակցելով SFL (ներկայումս՝ DataArt) ընկերության հետ, իսկ 2021 թվականի հուլիսից սկսել է համալրել իր հայաստանյան թիմը՝ միաժամանակ շարունակելով համագործակցությունը DataArt ընկերության հետ:
Ընկերության գլխամասը գտնվում է ԱՄՆ Կալիֆորնիա նահանգի Փասադենա քաղաքում: Qless-ն ունի մասնաճյուղ նաև Կոլորադո նահանգի Դենվեր քաղաքում, ինչպես նաև՝ անհատ աշխատակիցներ Արգենտինայում, Գերմանիայում, Միացյալ Թագավորությունում և Բարբադոսում։
QLess ընկերությունը հիմնադրվել է 2007 թվականին ԱՄՆ-ում և դարձել է իր ոլորտի առաջատարներից մեկը։ QLess-ը մասնագիտացել է հերթերի կառավարման և հանդիպումների պլանավորման ծրագրային ապահովման ոլորտում, որն օգնում է կազմակերպություններին անխափան կառավարել հաճախորդների հոսքը։ Ընկերության թողարկումները (պրոդուկտները) հնարավորություն են տալիս կազմակերպություններին բարձրացնել իրենց աշխատակազմի գործունեության արդյունավետությունը՝ կրճատելով իրենց հաճախորդների՝ հերթերում սպասելու ժամանակը:
