Ներդաշնակությո՜ւն… Ընդամենը մեկ բառ, որում ամփոփված է հույզերի մի ամբողջ բույլ, և որը հասկանալի ու հարազատ է բոլորին. այն միավորում է ժամանակաշրջանները, ավանդույթները, մշակույթները և ամենակարևորը՝ մարդկանց։ Հենց այս առանցքային գաղափարի շուրջ էր համախմբվել Հայաստանի աշխատաշուկայի լավագույն կազմակերպությունների ներկայացուցիչներին մեկ հարկի տակ միավորող STAFF.AM Gala 2025-ը։ Այս տարվա միջոցառումը ոչ միայն հերթական հանդիպում էր, այլ մի յուրօրինակ հարգանքի տուրք և մշակութային երկխոսություն, որը կրում էր «A Century of Harmony»՝ մեկ դար ներդաշնակություն խորագիրը։ Այս թեմայի ընտրությունը պատահական չէր. այն ոգեշնչված էր Հայաստանի ազգային ֆիլհարմոնիկ նվագախմբի՝ այս տարի նշվող հարյուրամյա հոբելյանով, ինչը միջոցառմանը հաղորդեց առանձնահատուկ նշանակություն։
Միջոցառումը մեկնարկեց staff.am և hirbee.ai համահիմնադիր Վահե Ավետիսյանի ողջույնի խոսքով․
Իմ ու մեր թիմի համար մեծագույն պատիվ է այսօր լինել այստեղ։ Մեծ հպարտություն է ունենալ նման համայնք, որը տարեցտարի աճում է։
Վահեի ողջույնի խոսքին հաջորդեց միջոցառման ամենատպավորիչ մշակութային պահը՝ Ազգային ֆիլհարմոնիկ նվագախմբի ելույթը դիրիժոր Ռուբեն Ասատրյանի գլխավորությամբ։ Նվագախմբի կամերային կազմը կատարեց հայ մեծերի ամենագեղեցիկ ստեղծագործությունները՝ դահլիճը լցնելով հոգեթով հնչյուններով, որոնք դարձան ներդաշնակության այն առաջին ակորդը, որի շուրջ կառուցված էր ամբողջ օրակարգը։
Երաժշտական այս բարձրակետը սահուն կերպով տեղափոխվեց բիզնեսի և ռազմավարական զարգացման տիրույթ, երբ բեմ բարձրացավ staff.am-ի համահիմնադիր Լուիզա Ավետիսյանը։ Շնորհակալություն հայտնելով նվագախմբին՝ նա բացահայտեց միջոցառման վայրի ու թեմայի խորհրդանշական կապը․
Երբ ամիսներ առաջ մեր թիմով սկսեցինք կազմակերպչական աշխատանքները, թեմայի և այնուհետ միջոցառման վայրի ընտրության հարցում երկար չվարանեցինք։ A century of Harmony` մեկ դար ներդաշնակություն խորագիրը հարգանքի տուրք է Ազգային ֆիլհարմոնիկ նվագախմբի հարյուրամյա հոբելյանին։
Խոսելով staff.am էկոհամակարգի մասին Լուիզան նշեց.
Եթե staff.am-ի 2025-ը մեկ բառով ամփոփեմ դա կլինի՝ «համագործակցություն» բառը։ Աբողջ տարվա ընթացքում, բացի մեր հիմնական գործունեության ուղղությունից, այն է օգնել ընկերություններին գտնել լավագույն տաղանդներին, մենք ունեցել ենք բեղուն համագործակցություններ մեր էկոհամակարգի այլ ուղղություններով՝ կրթական, մեդիա և վերլուծական։
Նմանատիպ արժեքավոր համագործակցությունների վառ օրինակ էր նաև Amio Bank-ի հետ գործընկերությունը։
Amio Bank-ի Մարդկային ռեսուրսների և մշակույթի ղեկավար Հռիփսիմե Գլիչյանը, խոսելով բանկի զարգացման նոր էջի մասին, ընդգծեց մարդկային գործոնի անփոխարինելիությունը.
Ցանկացած մեծ փոփոխության շարժիչ ուժը մարդիկ են, և այստեղ շատ կարևոր է, որ նրանք հավատան այդ փոփոխության դրական ուժին։
Իրենց հաջողված փորձով կիսվեցին նաև Coca-Cola HBC Armenia-ի ներկայացուցիչները։ ՄՌԿ տնօրեն Նելլի Փուրթոյանը և տաղանդների համալրման գործընկեր Տաթևիկ Բաբայանը պատմեցին գործատուի բրենդավորման կարևորության մասին.
Մեր ընկերությունում գործատուի բրենդավորումը ունի առանձնահատուկ ռազմավարական նշանակություն, թե արտաքին, թե ներքին ուղղություններով։ Արտաքինում մենք պատմում ենք թե ով է Coca-Cola HBC Armenia-ն, որպես գործատու, ինչ հնարավորություններ ենք տալիս և ինչ միջավայր ենք առաջարկում, իսկ ներքինում մենք ամեն օր կառուցում ենք այն միջավայրը, որտեղ կարող են մեր մարդիկ աճել, զարգանալ և զգալ իրենց ներգրավված։
Իր ելույթի ընթացքում Լուիզան ներկայացրեց staff.am էկոհամակարգը և էկոհամակարգի բոլոր 4 ուղղությունները․ նոր գործիքներ, մեդիանախագծեր, գործատուի բրենդավորման ծրագրեր, 15-ից ավել միջոցառումներ, թվեր ու վերլուծություններ։ staff.am էկոհամակարգի անչափ հագեցած 2025-ը ամփոփելը մեզ համար բարդ կլինի, ուստի առաջարկում ենք դիտել հոլովակը, որտեղ մեր գործընկերներն են պատմում լավագույն համագործակցությունների մասին։
Միջոցառման ընթացքում ներկայացվեցին նաև 2025-ի աշխատաշուկայի վերաբերյալ կարևոր տվյալներ, որոնք բացահայտում էին տիրող միտումներն ու զարգացումները։
Դե ինչ ժամանակն է ևս մեկ հաճելի դադարի՝ ակտիվ նեթվորքինգը։ Շփումն այնքան անմիջական էր ու հագեցած, որ մասնակիցները չէին ցանկանում կիսատ թողնել իրենց զրույցները՝ նույնիսկ երբ արդեն ժամանակն էր վերադառնալու դահլիճ։
Օրվա երկրորդ կեսին բոլորս հանդիպեցինք «Ներդաշնակության խաչմերուկում», որտեղ երեք տարբեր ուղեկիցներ մեզ օգնեցին բացահայտել ներդաշնակության տարբեր դրսևորումները։
Հոգեբան, արտ-թերապիստ Կարինե Խաչատուրյանը կիսվեց պրակտիկ խորհուրդներով, թե ինչպես կարելի է արվեստի միջոցով հասնել ներքին խաղաղության և ինչպիսի գործիքներ կարելի է կիրառել հենց կորպորատիվ միջավայրում՝ ներդաշնակ թիմային մթնոլորտ ստեղծելու համար։
Փոփոխությունը, աճը, զարգացումը սկսվում է այնտեղ երբ մենք սկսում ենք ստեղծել, և յուրաքանչյուրիս ներսում ապրում է այդ ստեղծաագործ կողմը։
Այնուհետև երգիչ, հեղինակ և դերասան Հայկ Պետրոսյանը մեզ տարավ մի ճամփորդության դեպի «կոմիտասյան ձայնաշխարհ»։ Նա պատմեց ներդաշնակության իր տարբերակի մասին, որը գտել է ձայների աշխարհում, որտեղ կյանքի յուրաքանչյուր պահի երգն ու մեղեդին քայլել են նրան համընթաց։ Այդ հոգեթով մեղեդիները թափանցեցին ներկաներից յուրաքանչյուրի հոգին՝ հասնելով մինչև գենային մակարդակում ունեցած այն հատուկ ազդակներին, որոնք մենք զգում ենք միայն ազգային մաքրամաքուր երաժշտություն լսելիս։
Ճանապարհի մեր վերջին ուղեկիցը ԱԻՆ փրկարար ծառայության գնդապետ, հեղինակ-կատարող և հնէաբան Արմինե Հայրապետյանն էր։ Այս լուսավոր մարդը կիսվեց անգնահատելի կարևոր մտքերով այն մասին, թե ինչպես դժվարին պահերին չկորցնել ներքին լույսն ու խաղաղությունը։ Նա առաջարկեց դժվարությունները դիտարկել որպես փոքրիկ տեխնիկական խոտաններ և դրանք վերածել ավելի մեծ լույսի աղբյուրի։ Դե իսկ զրույցի վերջում Արմինեի հոգեպարար կատարումը հուզեց բոլորին՝ դառնալով ներդաշնակության ամենաիրական հավաստումը։
Յուրքանչյուր վայրկյանի մեջ լուսավորը տեսե՛ք, փնտրե՛ք ու գտե՛ք, ու կգտնեք հաստատ, և աշխարհը ավելի ու ավելի սիրուն կդառնա ձեր շուրջը։
Եթե մինչև այս մենք լսում էինք թե բեմից ինչպես են կսիվում ներդաշնակության մասին, ապա այժմ ժամանակն է լսելու մեր միջոցառման հյուրերի ներդաշնակության բանաձևը։
Միջոցառման վերջում ջերմ ու մեծ թիմային լուսանկարը հաճելի ավանդույթ է դարձել։
Երբ մարեցին բեմի լույսերը, մենք հասկացանք, որ STAFF.AM Gala-ն պարզապես միջոցառում չէր. այն մի կանգառ էր «Ներդաշնակության խաչմերուկում», որտեղից յուրաքանչյուրս տուն տարանք մեր սեփական բանաձևը։ Մենք կիսեցինք ամենակարևորը՝ այն ջերմությունը, որն անհնար է տեղավորել որևէ հաշվետվության մեջ։ Թող այս օրվա հոգեպարար հնչյուններն ու Արմինեի պատգամած «ներքին լույսը» դառնան ձեր ուղեկիցը 2025-ի բոլոր մարտահրավերներում։
Այս տարվա ձեռքբերումները մեզ համար նոր հորիզոններ են բացում. մենք արդեն իսկ լի ենք մեծ ոգևորությամբ ու վճռականությամբ՝ հաջորդ տարի վերադառնալու է՛լ ավելի հավակնոտ ծրագրերով, նորարար լուծումներով ու հետաքրքիր նախաձեռնություններով, որոնք ավելի կամրապնդեն մեր համայնքը։ Մենք չենք ասում հաջողություն, մենք ասում ենք՝ շնորհակալություն այս ներդաշնակությունը միասին կառուցելու համար և մինչ նոր, էլ ավելի մասշտաբային հանդիպումներ հաջորդ տարի։
