staff.am-ը շարունակում է ընդլայնել իր համագործակցությունը պետական մարմինների հետ մարդկային ռեսուրսների հավաքագրման ոլորտում։ Այդ առիթով կնքվեց համագործակցության հուշագիր ՀՀ աշխատանքի և սոցիալական հարցերի նախարարության, ի դեմս գլխավոր քարտուղարի պարտականությունները կատարող Ստեփան Մաչյանի և staff.am-ի, ի դեմս համահիմնադիր ղեկավար Վահե Ավետիսյանի և Նազելի Բադալյանի միջև։
Առաջին փուլում համագործակցությունը ենթադրում է նախարարության թափուր և ժամանակավոր թափուր աշխատատեղերի վերաբերյալ հայտարարությունների տարածում staff.am հարթակի և վերջինիս պատկանող սոցիալական ցանցերի ու մոբայլ հավելվածի միջոցով՝ դրանով իսկ հայտարարություններն ավելի հասանելի դարձնելով հասարակության լայն շրջանակների համար։
«Մենք արժևորում ենք այս համագործակցությունը և հավատացած ենք, որ staff.am-ի կողմից առաջարկվող տեխնոլոգիական լուծումների շնորհիվ պետական հատվածում անհրաժեշտ մասնագետների հավաքագրումը կընթանա առավելագույն արդյունավետությամբ»,- նշեց staff.am համահիմնադիր ղեկավար Վահե Ավետիսյանը։
Երկրորդ փուլով նախատեսվում է ավելի խորացված համագործակցություն staff.am և ՀՀ աշխատանքի և սոցիալական հարցերի նախարարության միջև։
staff.am և պետական հատված համագործակցությունը երկարաժամկետ և շարունակական է։ Արդեն մեկնարկել է ՀՀ կրթության, գիտության, մշակույթի և սպորտի նախարարության միջև համագործակցությունը, իսկ առաջիկայում պլանավորվում է համագործակցություն մյուս նախարարությունների և այլ պետական մարմինների հետ։
