Ժամանակակից աշխատաշուկան կենդանի օրգանիզմ է, որը զարգանում է աննախադեպ արագությամբ՝ թելադրելով խաղի նոր կանոններ թե՛ գործատուներին, թե՛ կրթական համակարգին։ Հատկապես ֆինանսական ոլորտում, որտեղ թվայնացումն ու տեխնոլոգիաները վերափոխում են ավանդական մասնագիտությունները, ԲՈՒՀ-Գործատու երկխոսությունը դառնում է ոչ թե ցանկալի, այլ կենսական անհրաժեշտություն։
Հենց այս հրամայականով՝ փետրվարի 25-ին staff.am-ըմասնակցեց Հայաստանի Եվրոպական համալսարանի (ՀԵՀ) կողմից կազմակերպված «Կրթությունից գործընկերություն․ ֆինանսիստների աշխատաժողով» խորագրով միջոցառմանը՝ նպատակ ունենալով կառուցել այն կամուրջը, որը կմիացնի ակադեմիական գիտելիքը բիզնեսի իրական պահանջներին։
Աշխատաժողովի նպատակն էր քննարկել բուհ-գործատու համագործակցության իրական մոդելները և գործընկերության եղանակները ֆինասնական ոլորտում՝ մշակելով աշխատաշուկայի կարիքների բավարարման համատեղ մոդել։Միջոցառման իրականացման արդիական հիմքերից էր staff.am-ի կողմից իրականացված «ՀՀ Աշխատաշուկա 2025» զեկույցը, որը փաստում է՝ Հայաստանում ամենապահանջված 20 մասնագիտությունների դիրքերում շարունակում են մնալ ֆինանսաբանկային և ապահովագրական ոլորտը։
Աշխատաժողովի ընթացքում staff.am-ի Համագործակցությունների ու բիզնեսի զարգացման բաժնի ղեկավար Ալինա Գևորգյանը կիսվեց «ՀՀ Աշխատաշուկա 2025» զեկույցի կարևոր տվյալներով՝ նշելով, որ որ 2025 թվականին Հայաստանի աշխատաշուկայում հիմնականում պահպանվել է նախորդ տարվա տրամաբանությունը։ Ամենապահանջված 20 մասնագիտությունների ցանկում առաջատար դիրքերը շարունակում են զբաղեցնել ֆինանսաբանկային, վաճառքի և սպասարկման ոլորտները, ինչը վկայում է շուկայի պահանջարկի հավասարակշռված բաշխման և կայունացման մասին։ Կոնկրետ ֆինանսաբանկային ոլորտում գործատուներն առավել հաճախ փնտրում են բանկային գործի, հաշվապահության, վաճառքի և ֆինանսական վերլուծության մասնագետների։ Սակայն, այս կայունության ֆոնին նկատվում է աշխատավարձերի թռիչքային աճ․ ոլորտի միջին աշխատավարձը հասել է 1,104,400 ՀՀ դրամ ցուցանիշի։
Զեկույցի ամենաուշագրավ բացահայտումներից մեկը բանկային համակարգի թվային տրանսֆորմացիայի խորացումն է։ 2025-ին առաջին անգամ ոլորտի ամենապահանջված մասնագիտությունների տասնյակում են հայտնվել տեխնոլոգիական ուղղվածության այնպիսի մասնագիտություններ, ինչպիսիք են ՏՏ անվտանգությունը (Cybersecurity) և Պրոդուկտի կառավարումը (Product Management)։ Սա հստակ ազդակ է ուսանողների համար, որ ժամանակակից ֆինանսիստի դիմանկարը փոխվել է․ այժմ մասնագիտական գիտելիքներին զուգահեռ անհրաժեշտ է ունենալ նաև թվային գրագիտության բարձր մակարդակ։
Ինչ վերաբերում է ոլորտում պահանջված հմտություններին, ապա մասնագիտական հմտությունների շարքում առավել կարևորվում են ՀՀ բանկային օրենսդրության, MS Excel-ի, Ֆինանսական վերլուծության գիտելիքները, իսկ փափուկ հմտությունների շարքում՝ ժամանակի կառավարման, թիմային աշխատանքի և բանակցային հմտությունները։
Կարևոր շեշտադրումներից էր նաև, որ ֆինանսաբանկային ոլորտը, ինչպես շատ ոլորտներ, ևս ենթարկվում է ժամանակի պահանջի փոփոխություններին՝ արհեստական բանակնության ծրագրերի կիրառմանը զուգընթաց։ Այժմ շուկան փնտրում է նոր ֆինանսիստների, որոնք պետք է տիրապետեն մասնագիտական նոր հմտությունների և գիտելիքների, և նրանք, ովքեր կադապտացվեն այս պահանջին, ավելի մրցունակ կլինեն շուկայում։ Նոր մասնագիտություններից է օրինակ ֆինասնական ոլորտի հրահանգավորողը։
Ամփոփելով հանդիպումը՝ Հայաստանի Եվրոպական համալսարանի Ֆինանսների և բանկային գործի ամբիոնի վարիչ Արմենուհի Մհերյանը բարձր գնահատեց Staff.am-ի հետազոտության դերը կրթական ծրագրերի արդիականացման հարցում և հայտնեց համալսարանի պատրաստակամությունը՝ շարունակելու համագործակցությունը աշխատաշուկայի պահանջներին համապատասխան որակյալ կադրեր պատրաստելու նպատակով։
Որպես գործնական արդյունք՝ մասնակից գործատուները հանդես եկան «գործատուների կողմից պատվիրակված կրթության» մոդելի զարգացման առաջարկով։ Սա ենթադրում է, որ բուհերը կադրեր կպատրաստեն՝ հիմնվելով կոնկրետ ընկերությունների ընթացիկ և ապագա կարիքների վրա՝ էապես մեծացնելով շրջանավարտների՝ մասնագիտությամբ աշխատանք գտնելու հնարավորությունները։
Staff.am-ը շարունակում է հավատարիմ մնալ իր առաքելությանը՝ տրամադրելով տվյալահեն վերլուծություններ և հարթակ ստեղծելով արդյունավետ համագործակցությունների համար։ Մենք վստահ ենք՝ նմանատիպ նախաձեռնությունները հիմք են դնում Հայաստանում ավելի որակյալ, կայուն և զարգացած մասնագիտական էկոհամակարգի ձևավորմանը։
