Տարվա եզրափակիչ՝ ամենատոնական ու դինամիկ ամիսը staffmedia.am-ում հագեցած էր ոչ միայն ամփոփումներով, այլև ոգեշնչող նորություններով ու ձեռքբերումներով: Դեկտեմբերն առանձնացավ «ՀՀ Աշխատաշուկա 2025» ամենամյա զեկույցի հրապարակմամբ, որն այս տարի ներկայացավ աննախադեպ ծավալով և կարևոր բարեգործական առաքելությամբ։ STAFF.AM Gala 2025-ի շրջանակներում մենք վայելեցինք բիզնեսի և արվեստի կատարյալ միաձուլումը՝ մեկ հարկի տակ միավորելով ոլորտի առաջատարներին, իսկ ամսվա օրակարգն ամբողջացրին մեր գործընկերների կրթական նշանակալի նախաձեռնությունները։
Միասին տեսնենք, թե ինչպես ենք եզրափակել տարին և ինչ նորություններ է բերել դեկտեմբերը:
ՀՀ Աշխատաշուկա 2025
«ՀՀ Աշխատաշուկա 2025»-ը թվով արդեն իններորդ ծավալուն ուսումնասիրությունն է, որն իրականացվում է staff.am-ի հիմնադրումից ի վեր։ Աշխատաշուկայի համապարփակ վերլուծության նպատակն է օգնել ՀՀ-ում և դրա սահմաններից դուրս գտնվող անհատներին և կազմակերպություններին ավելի լավ պատկերացում կազմել ՀՀ աշխատաշուկայի հիմնական ցուցանիշների վերաբերյալ։
«Աշխատաշուկա 2025» զեկույցն իրականացվում է staff.am էկոհամակարգի Compass վերլուծական ուղղության շրջանակներում։ Compass-ի մանրամասներին կարող եք ծանոթանալ հղմամբ։
Այս տարի, արդեն չորրորդ անգամ «ՀՀ Աշխատաշուկա» զեկույցն ունի բարեգործական առաքելություն։ Այն ծավալուն աշխատանքը, որը տարվում է staff.am թիմի կողմից զեկույցը ստեղծելու համար և լայն կիրառությունը, որն այն ունի, արժանի է մի փոքր ուշադրության, որը կխնդրենք, որպես գնահատանք, փոխանցել «Հայորդի» բարեգործական հիմնադրամին` հանգանակություն կատարելով «Իմաստ» հարթակում։
STAFF.AM Gala 2025-ը բիզնեսի և մշակույթի ամենաներդաշնակ խաչմերուկում
Ներդաշնակությո՜ւն… Ընդամենը մեկ բառ, որում ամփոփված է հույզերի մի ամբողջ բույլ, և որը հասկանալի ու հարազատ է բոլորին. այն միավորում է ժամանակաշրջանները, ավանդույթները, մշակույթները և ամենակարևորը՝ մարդկանց։ Հենց այս առանցքային գաղափարի շուրջ էր համախմբել Հայաստանի աշխատաշուկայի լավագույն կազմակերպությունների ներկայացուցիչներին մեկ հարկի տակ միավորող STAFF.AM Gala 2025-ը։ Այս տարվա միջոցառումը ոչ միայն հերթական հանդիպում էր, այլ մի յուրօրինակ հարգանքի տուրք և մշակութային երկխոսություն, որը կրում էր «A Century of Harmony»՝ մեկ դար ներդաշնակություն խորագիրը։ Այս թեմայի ընտրությունը պատահական չէր. այն ոգեշնչված էր Հայաստանի ազգային ֆիլհարմոնիկ նվագախմբի՝ այս տարի նշվող հարյուրամյա հոբելյանով, ինչը միջոցառմանը հաղորդեց առանձնահատուկ նշանակություն։
Խորհուրդ ենք տալիս կարդալ ամբողջական հոդվածը և ևս մեկ անգամ վերապրել այն ջերմությունն ու ներդաշնակությունը, որը կիսեցինք մեր գործընկերների հետ։
«Դասավանդի՛ր հանուն Հայաստանի» կրթական հիմնադրամը և «Իզի Փեյ» ընկերությունը ստորագրեցին համագործակցության հուշագիր
«Դասավանդի՛ր հանուն Հայաստանի» կրթական հիմնադրամը և «Իզի Փեյ» ընկերությունը ստորագրել են համագործակցության հուշագիր՝ նպատակ ունենալով խթանել կրթական նախաձեռնությունների հասանելիությունը և հանրային ներգրավվածությունը նորագույն տեխնոլոգիական լուծումների միջոցով։
Հուշագիրը ստորագրվել է «Դասավանդի՛ր հանուն Հայաստանի» կրթական հիմնադրամի առաջխաղացման գծով տնօրեն Վարդան Փարթամյանի և «Իզի Փեյ» ՍՊԸ-ի գործադիր տնօրեն Մհեր Գալստյանի կողմից։
Կողմերը կարևորում են կրթական ոլորտի զարգացման գործում հասարակության ակտիվ մասնակցությունը և վստահ են, որ ֆինանսական ու տեխնոլոգիական գործիքների կիրառումը կարող է էական դեր ունենալ կրթական ծրագրերի կայուն զարգացման և ազդեցության ընդլայնման գործում։
«Դասավանդի՛ր հանուն Հայաստանի»-ն Դի-Էյջ-Էլ հայաստանյան գրասենյակի աջակցությամբ կազմակերպեց GoTeach կարիերայի տոնավաճառը
Դեկտեմբերի 3-ին «Դասավանդի՜ր հանուն Հայաստանի»-ն կազմակերպեց GoTeach կարիերայի տոնավաճառ Երևանում՝ միավորելով աշակերտներին, ուսուցիչներին և տարբեր ոլորտների մասնագետներին՝ ապագա կարիերայի հնարավորությունները ուսումնասիրելու և քննարկելու համար։
Միջոցառումը կազմակերպվել է Դի-Էյջ-Էլ հայաստանյան գրասենյակի աջակցությամբ՝ DHL Group-ի և Teach For All-ի գլոբալ GoTeach գործընկերության շրջանակում։ GoTeach-ի նպատակն է աջակցել երիտասարդներին ամբողջ աշխարհում՝ տրամադրելով գիտելիքներ ու հմտություններ, որոնք անհրաժեշտ են ժամանակակից աշխատաշուկայում հաջողելու համար։
Կարիերայի տոնավաճառի նպատակն էր աշակերտներին ծանոթացնել տարբեր մասնագիտական ուղղությունների հետ և նրանց ներառել քննարկումների մեջ Հայաստանում և աշխարհում արագ փոփոխվող աշխատաշուկայի վերաբերյալ։
